林芊妤見家長推Job肉赤

藝人林芊妤（Coffee）、胡琳昨日到工展會出席活動，身穿運動衫的Coffee即場教做瑜伽動作，Coffee即將與男友Weng到澳洲旅行，順道探訪男友的父母，為此推掉不少工作，十分肉痛：「聖誕好多活動都接唔到，我唔係重色輕工作嘅，但冇法。」問到與男友何時拉埋天窗？她表示未想到太長遠：「但佢有話同我生小朋友好唔好。（暗示喎？）唔係嘅，我哋拍拖一年啫，我都仲係女強人嚟！」胡琳則透露父親近日要來港睇心臟科醫生，會留港一個月覆診，難得與父親單獨相處。