王浩信 朱千雪 爆冷奪帝后？

無綫《萬千星輝頒獎典禮2016》明天舉行，多日來各獎項獲提名的藝人都不斷為自己拉票，而今年視帝、視后獎項競爭激烈，之前是陳展鵬、胡定欣坐定粒六「攞硬」姿態示人，到最近《致命復活》中的郭晉安呼聲愈來愈高。據知最新走勢相當緊張，男主角方面，依次序票數以《城寨英雄》的陳展鵬維持最高，之後就是《幕後玩家》的黃宗澤及《一屋老友記》的歐陽震華；而女主角方面，是《城寨英雄》的胡定欣領先，而《EU超時任務》的朱千雪及《來自喵喵星的妳》的田蕊妮緊隨其後，但據可靠消息指，視帝及視后方面的票數相當接近，即大有機會黃宗澤及朱千雪會後來居上，展鵬與定欣「大滿貫」機會危危乎。最令人驚訝的是，郭晉安竟然三甲不入。

有信心諗定上台講乜

此外，昨日網上流傳一份台慶得獎名單，指《EU超時任務》的王浩信及朱千雪會奪得視帝、視后獎項，浩信受訪時說：「呢啲都係人為，不過都好多謝佢哋，見到阿雪攞視后都戥佢開心，佢經驗唔係好豐富，但佢觀眾緣好幫到手。（打咗一支強心針？）咁我都諗定上台要講乜，信心一定要有，都先多謝投咗我一票嘅朋友，結果係點唔好諗咁多。」

患創傷後遺症諗過死

浩信之前接受專訪，他坦言拍攝《致命復活》撞車後，真的患上創傷後遺症，一度諗過「不如下一秒死咗佢」，亦曾試過拍攝期間忽然「驚恐來襲」，跑了出錄影廠，蹲在地上出不到聲，對身邊人有恐懼，又自爆曾於家中突然想企出露台玩命影相，幸最後控制住冇做到。問他有否看醫生？他說：「有做身體檢查，但精神情緒方面就冇，因為我2012年都試過情緒低落睇醫生，所以懂得處理，幸好套劇拍完已經沒事。」

文：影視組

王浩信服裝：Popcorn General Store