胡桐語淋雨截車罰企六粒鐘險暈
來自馬來西亞的歌手胡桐語（Iris）憑其「九頭身」及「甜美酒渦」，成功在日本藝能界闖出名堂，已推出兩張單曲。為讓日本人認識，Iris更不介意「瞓K房」過夜，拍真人騷時更要冒雨截車，企街六粒鐘險暈。談到音樂，她最期望與偶像玉置浩二合作。
去年三月Iris於日本正式出道，擁有長腿的「九頭身」身形相當煞食，更「孭飛」一個旅遊真人騷節目火速被日本人認識，並接拍首個日本護膚品牌廣告。今次Iris來港為第二首日文歌《I love me》宣傳及訪問。
怕累攝影師瞓街
講到拍真人騷，Iris承認過程很艱辛，因獨自在「冇錢、冇電話」情況下，從日本最北走到最南地方：「試過企喺街要截順風車去下一站，但企足六粒鐘都截唔到車，仲要落雨，病到差啲暈喺街。（冇地方住點算？）要去做兼職搵錢，隨時冇地方就要瞓K房，但凌晨四點就收，跟住就要去24小時快餐店坐天光。」Iris稱隨行只有一位攝影師，若她搵不到地方借宿，會連累對方都瞓街，故大感壓力。
唔揀小鮮肉合作
談到日本藝能界競爭激烈，Iris說：「唔單止日本難，其實香港，甚至全世界嘅娛樂圈都係好難，只要做番自己唔好放棄。」問到想和哪位日本藝人合作？Iris說：「我好鍾意玉置浩二，好想同佢學吓音樂嘅嘢，可惜仲未有機會見到佢。（唔揀日本小鮮肉？）好多人都話估唔到我會鍾意咁耐以前嘅歌手，但我好鍾意佢把聲，好好聽，令人好感動。」
場地：香港九龍貝爾特酒店
文：音樂組
攝：劉智源