筱靖搶做契姨媽包養趙哲妤母女
臨盆在即的藝人趙哲妤（Uny），將與好友筱靖於聖誕節期間，在位於荔枝角的市集開設檔口擺賣食品，她們日前相約到場地視察環境，又順道參觀場地的戶外雪場，表現雀躍！Uny又透露懷的是B女，筱靖表示已與B女上契，豪言會負責供養Uny兩母女，好姊妹雪中送暖，相信單親媽媽Uny這個聖誕絕對不太冷！
明年1月9日是Uny的預產期，搞作多多的她仍冇時停，與好姊妹筱靖於聖誕期間開設檔口擺賣食品，經營德國餐廳的筱靖說：「我一路有做飲食生意，試過擺唔同嘅展會，之前做完美食節，覺得幾好，所以一路睇唔同嘅場地，諗住擺市集。」
筱靖認為位於荔枝角的這個場地很適合年輕人，故選擇在此擺賣酒和德國菜，而拍檔Uny則擺賣零脂肪乳酪雪糕，Uny說：「屋企開素食餐廳，本身好少擺展覽，想學吓筱靖，吸納唔同客戶，年輕人鍾意食甜品，零脂肪好啱健康元素，呢個場又夠大。」筱靖亦大讚Uny擺賣的熊仔造型乳酪雪糕夠晒可愛！
開工當胎教
眼見Uny已肚大如籮，問會否感吃力？她笑說：「大住肚都要工作，係一個好實在嘅胎教。」筱靖亦指Uny的身體比她還要好：「未見過大肚婆咁性感，仲成日話熱。」Uny透露今胎是女兒，如今有兩個人的體溫，故感到溫暖，筱靖說：「我已經做咗BB女嘅契姨媽，因為佢太多朋友，契媽太多，費事BB第時逐個數，所以我做契姨媽，得一個！何況我不嬲當佢妹，所以做姨媽都好正常。」為照顧Uny兩母女，筱靖更推了不少工作：「年底比較忙，但都想陪佢多啲，完咗呢個Project，就盡量陪佢多啲。」她又大爆Uny不聽話偷飲汽水，行為很細路女。
B女腳法勁
筱靖對Uny的照顧無微不至，當參觀場地位於天台的戶外雪場時，不時叮囑Uny要小心，面對眼前雪景，Uny開心說：「今年聖誕節留喺香港過，派對盡量少啲去，或者晏晝去。依家佗住女睇雪景，梗係開心啦，小朋友見到好靚嘅嘢，聽到音樂嘅時候都會有反應，咁我心情好，佢都會心情好。」她又指B女經常踢她：「佢依家踢我唔係普通一兩下，係連續三十下，我會數，數到三十下，我會話：『好囉喎你！』」而最令筱靖不放心的是Uny仍是獨居，又不懂照顧自己，筱靖更叫她不要再工作，豪言要養起她兩母女，Uny當然暖入心！
場地：D2 Place一期
文：李惠儀
攝：劉智源