農夫驚嘟嘟嬲豬唔敢叫契媽

農夫密密拍劇做主持搵真銀，但未有放棄出碟做音樂的「老本行」，談到早前推出的EP專輯《你而家無，但係將來會有（下集）》，他們表示想講的就是長大後隨之而來的煩惱和唏噓，問到是否已鬧「中年危機」？C君與陸永抵死地說：「中年契機就有！差唔多中年先愈嚟愈多機會，所以唔可以話係危機。」莫非人到中年「把女」機會更多？人夫陸永即說：「我成日把女啦！把幾個咁多（指老婆及兩個女），依家幾好，一切順順利利，又有機會可以拍吓劇，又做到主持，都叫做中年先嚟多啲機會。」

農夫與鄭裕玲（嘟嘟）主持節目擦出不少火花，嘟嘟一手帶兩人「入屋」，可謂他們的中年「契機」！農夫說：「絕對係，嗰個係中年契媽啦！唔係契機！（上契？）佢唔會啦！契媽太老，契妹佢可能制，或者做我哋中年契女啦！（叫嘟嘟喺專輯中獻聲？）一定冇可能，連佢自己都話乜都叻，唯獨唱歌唔叻喎！」

農夫加上嘟嘟（右二）及黃翠如，令觀眾笑到肚痛！

C君（左）與陸永坦言人到中年，機會反而愈來愈多。

唱到旺角挑戰大媽

問到可有計劃再開騷？農夫笑言想反傳統，在旺角行人專用區開演唱會，C君說：「因為平時嘅演唱會，係一啲鍾意你嘅人買飛入場睇你，但街頭騷就唔同，係有好多唔識自己嘅人，要佢哋停下腳步聽你唱歌，我覺得好有挑戰性。（要同啲駐場大媽鬥唱？）唔理啦！Featuring啲大媽囉！或者啲阿叔又出嚟頂住隻碗永遠唔跌嗰隻，我哋都可以頂住隻碗唱幾首o架！」

文：音樂組　

攝：張福宏