伍詠薇冇細路畀佢玩

入行27年的伍詠薇（伍姑娘），當選亞姐又拍劇集及電影，最近更作多方面嘗試，擔任主持、導演之餘，再演舞台劇《嬉春酒店2016》。去年演過同一劇目的她，笑言沒信心駕馭「偷食」人妻的角色，幸得拍檔兼舞台劇藝術總監詹瑞文免費為她「特訓」5日，令她演技大躍進，她笑說：「直情有脫胎換骨嘅感覺！」

演技層次升班，問可會作大膽突破，像焦媛般「全裸」為藝術犧牲？向來大膽的伍姑娘說：「演員全情投入演戲，身體就係一副演軀，應該徹底向觀眾奉獻！我個人好大膽，只要唔係鹹濕，用真係欣賞嘅眼光，除衫都冇所謂！」

「佢對我包容都唔少」

事業上搏到盡，跟老公練海棠（老練）的關係，她卻以輕鬆、自在的態度處理，相信是經過老公「偷食」事件所致：「上次單嘢我好冷靜，人大咗，17年婚姻，呢啲小風波係唔想發生，後來我都有檢討自己，一段關係耐咗會咁。『老練』好似小朋友想偷波板糖，唔通我打到佢豬頭咁咩！教囉！大家盡量做好本分，大家已經變成伴侶，一啲耐嘅Couple會明白我講乜。『老練』好錫我，其實自己好似一匹野馬，仔又唔同佢生，又冇細路仔畀佢玩，只係玩貓，佢對我包容都唔少！今次呢件事，我更加畀空間佢，依家好似朋友兼老公嘅關係，咁先會細水長流！」

髮型、化妝：miss5

服裝：IIJIN

首飾：ARTE

場地：千禧新世界香港酒店嵯峨野

文：影視組