拳佬陳展鵬挑戰視帝大滿貫

陳展鵬今年憑《城寨英雄》「拳佬」一角，先後橫掃新加坡與馬來西亞兩地稱帝，成為《萬千星輝頒獎典禮2016》視帝大熱，有望於三地稱帝成就「大滿貫」！不過，由於兩地舉行頒獎禮之時，郭晉安主演的《致命復活》尚未播出，三屆視帝安仔隨時攔途截擊！

唔擔心安仔殺出

講到今年呼聲最高，展鵬感謝觀眾認同，直言得到好大共鳴，因此感到滿足，問會否期待「大滿貫」奪視帝？他說：「諗到都開心嘅，自己死撐咁耐，演咗21年，有人話係蝸牛嘅時間，但比好多人好彩，拎獎嘅感覺係好似好近、又好似好遠，但每一年都愈來愈近。拳佬係入行以來一直等緊嘅角色，雖然唔係難演，但喺呢行咁耐，演番一個比較單純嘅角色係有困難，而且有動作戲，可能係觀眾最認同嘅角色。（擔心安仔憑《致命復活》殺出？）擔心唔嚟，最重要觀眾真係喜愛。（《城寨》較輕鬆，觀眾較受落？）觀眾鍾意睇有誠意嘅劇集，佢哋會睇到付出幾多，武打題材近年少，每位演員都好落力，大家都有受傷。」

明年減產陪家人

展鵬成為劇集寵兒，已不停拍劇四、五年的他笑言已「斷六親」，問會否想得獎回報家人支持？他說：「佢哋當然想我拎獎、有人認同。（見你拍劇受傷心痛？）其實拍《城寨》時，媽咪都幫我捽跌打酒，有啲地方拍到勞損，自己捽唔到。但佢知我等緊一個發揮到嘅角色，拳佬由第一集到尾都係講緊自己嘅古仔，父母知我等到機會，都有叫我加油。」

無論得獎與否，展鵬已計劃來年減產，希望多與家人相處：「自上年拎咗我最喜愛角色，已經欠咗好多人情。每個人有唔同階段，要搏殺、都要有生活同享受，已經唔記得幾耐冇同家人團聚，希望可以同屋企人去旅行，自己亦係時候學多啲嘢。」

文：影視組