黃智雯下令馬國明跳黑絲舞

藝員馬國明、黃智雯、謝東閔、馬貫東、魯振順與監製潘嘉德等，昨日於中環敲響鑼鼓，登上花車巡遊皇后大道，宣傳劇集《流氓皇帝》，眾演員更於鬧市派金幣及海報實行「貼地」接觸，吸引近百人逼爆皇后大道。

劇迷讚搞笑

雖然劇集緊接話題劇《幕後玩家》播出，但觀眾反應不錯，不少劇迷讚相當搞笑，問到收視如何？Mandy笑說：「第一集好似有23、24點，之後會愈嚟愈搞笑，對收視都有信心！」馬明即說：「咁高？好好喎！」似乎對收視成績感滿意。講到不少主演缺席，要二人再孭飛宣傳，Mandy表示大家都好忙，希望之後齊人宣傳，令收視繼續上升。

黃智雯話收視幾好，叫馬國明跳舞慶祝。

新劇《流氓皇帝》演員拉隊落區宣傳，大受歡迎。

腳毛多又長

劇中飾演妹仔的Mandy更預告稍後會有大變身：「之後我嘅角色會180度轉變，會着黑絲演百老匯式歌舞，有黑絲、有浴袍！集集都有唔同造型，自己都好期待睇番。」而馬明亦表示期待，更酸溜溜說：「佢喺《降魔的》啲吻戲都係畀晒黃子恆囉！」問到高收視會如何報答觀眾？Mandy說：「佢哋四個（馬國明、袁偉豪、謝東閔、古明華）就着黑絲跳舞，25點就着，快啲有得睇吖嘛！」馬明則說：「交畀閔大人（謝東閔）啦！佢條腿夠長吖！我太多腳毛！」智雯笑說「有腳毛先正！」最終，馬明代表其他三男答應，認真重口味！

文：影視組