黃日華幫芷晴Check男友
藝人黃日華與女兒黃芷晴昨日首度以父女檔，出席瑞士天梭表「讓愛傳承」聖誕活動，芷晴即場揀選一對手錶送給父母作為聖誕禮物。黃日華笑稱自己是「茄哩啡」，純粹來幫手：「我私底下都收到風會做，只係等佢開口，同埋我覺得今次活動幾有意義，一代傳一代，無論物件或者行為都傳畀下一代。（咁你傳咗咩畀個女？）做一個好人囉，循規蹈矩！（傳統結婚生仔？）結婚生仔每個人必經，不過我唔會幫佢揸主意，等佢自己覺得幾時需要。」
早前芷晴與男友為活動拍攝宣傳照，很多朋友以為她結婚致電恭喜，黃日華亦直認正觀察女兒的男友：「睇吓佢有咩長處或者缺點，私底下同個女講，等佢傳話，暫時覺得佢對個女都OK，幾體貼！」芷晴即大賣口乖，希望男友以父親為榜樣。
