陸詩韻騰騰震闖吊橋
搞護膚品生意的陸詩韻（Sharon）日前出發到日本，與當地廠商傾合作，她又抽空會合好友瑪姬及路芙到四國遊玩。期間Sharon自爆旅程中到訪古老吊橋，自認論盡的她全程驚到腳震震，她說：「我本身畏高，條橋個底就係條河，一差錯腳就插落條橋啲穿窿位。佢哋仲要狂搖條吊橋，我行到腳都震晒！之後大家去溪澗坐石，以及坐欄杆影相都論論盡盡，差啲一齊跌落街，但好彩大家互相扶持！」
單身的Sharon又言此行苦無艷遇：「冇呀，因為年輕人多數唔留喺四國，較多上咗年紀嘅當地人同遊客。我哋自顧自玩，全程冇艷遇真係太、太可惜喇！」至於瑪姬搞笑踢爆同房的路芙睡覺時打鼻鼾，嘈到似足打雷，她試過要半夜大聲喝醒對方，才令自己有覺好瞓。她又笑言與Sharon到訪當地主題樂園時狂玩旋轉木馬，臨走時頻頻被遊戲操作員盛讚靚女，令二人開心足半日！
唔介意養男人
此外，昨日性感出席活動的Sharon於本月29日生日，希望身體健康及事事順利。問到可想找個伴？她笑說：「唔諗啦，愈恨愈冇，同我差唔多年紀嘅人都結婚生仔，我細佬都有細路，我更加冇壓力，要有事業先，有咗事業就唔使顧慮對方有冇經濟能力，養埋佢都OK。（唔介意養埋對方？）如果我有能力，何樂而不為？」
文：影視組