蔡加讚聖誕做伴遊獎勵圓圓
玩具大王蔡志明兒子蔡加讚旗下公司生產的人工智能電子狗勇奪設計大獎，前晚在太太汪圓圓陪伴領獎。加讚公開讚圓圓照顧三名子女夠晒辛苦，計劃聖誕送澳洲豪華旅遊慰妻，揚言用愛去獎勵太太。
蔡加讚旗下公司WowWee Group Ltd推出的人工智能電子狗，榮獲香港工商業獎「消費產品設計大獎」，前晚在愛妻汪圓圓與家姐蔡加敏陪同下領獎，當然不少得拖埋智能電子狗！加讚即席示範玩「狗」，以廣東話指令電子狗做出瑜伽動作，「牠」還識得跳舞與做出「飄移」動作，逗得主人加讚忍不住大笑，他說：「呢隻人工智能電子狗叫CHiP™，每隻都可以培養出唔同個性，佢會隨住主人點樣對待而改變脾性！如果你成日鬧佢，佢係會匿埋唔啋你，同主人有互動。」他透露公司早前設計的機器人亦曾獲得獎項，今次已經是第四次獲獎，開心不已。該智能電子狗售價為199元美元（約1,600港元）。
生夠四個？唔係唔想嘅！
聖誕將至，加讚透露已計劃與太太及三子女前往澳洲旅行：「今次一家五口、同埋圓圓姐姐一家去，好期待！因為平時唔係成日見到小朋友，可以連續對住佢哋個幾星期咁耐好期待。（幾耐冇一家人出埠？）自己做嘢就成日飛，但同家人今年係第二次！夜晚小朋友早瞓，見唔到面玩，媽媽日日湊住佢哋好辛苦。（點獎勵太太？）成日獎勵喎！我用我嘅愛去獎勵！（聖誕送乜禮物畀太太？）要保持神秘！小朋友禮物都未買，大女鍾意唱歌跳舞，會買佢鍾意嘅嘢，大女已經掛咗五隻襪喺屋企，要諗吓買啲乜放入去。」
加讚笑言每次見小朋友也感到很開心，即時煩惱盡除，問到會否再追第四個BB時說：「暫時三個已經好開心！再生要多啲鍛煉先得，唔係唔想嘅！（知道太太湊BB辛苦？）係！做媽媽好偉大。」一直站在身旁的圓圓聞言一度面露感動，兩夫婦認真恩愛。
文：名人組