曹永廉友人撐腰楊明打定輸數
今年男配角之爭的激烈情況並不遜色於女配角，曹永廉於《公公出宮》飾演乸型公公「細雞」令人印象深刻。已奪新加坡男配的他被視為台慶頒獎禮的頂頭大熱，連日來好兄弟黎耀祥、蕭正楠、黃浩然等都肉緊為他拉票，阿廉直言對得獎增加信心，不過仍以平常心看待。他說：「對手好勁，楊明同張頴康機會都好大，楊明今年嘅進步好明顯，可以發揮嘅空間好大，睇好佢。」
阿廉認為《公公出宮》是年初播的劇集，觀眾忘記亦是理所當然，但又不忘多謝好兄弟：「好多謝佢哋幫我拉票，不過今次入圍反而無咁緊張，因為新加坡都拎咗啦，係信心大啲，不過都係平常心。」
盼演滿意角色
至於憑《火線下的江湖大佬》在馬來西亞奪得男配的楊明坦言沒有因此增加信心，反而睇好吳岱融及曹永廉。他說：「自問我未夠班拎啦，咁多前輩喺度。吳岱融喺《巨輪Ⅱ》角色咁出，帶起成套戲。阿廉喺《公公出宮》入面扮乸型又好笑。」他笑指對手強勁，無謂垂死掙扎，希望將來可以演到一個自己滿意的角色而再獲提名。
