撻着有米賽車手王卓淇隨時嫁
前港姐王卓淇近日放閃，承認與圈外男友黃巨榮（Ken）蜜運中，早前更在網上公開溫馨合照，幸福滿瀉！原來Ken在賽車界有「中山二少」之稱，除了是飄移賽車手外，更是賽車公司老闆，父親則在內地經營地產生意，與有家底的王卓淇門當戶對，雙方屋企更是世交！
昨日王卓淇受訪時難掩甜蜜：「我哋真係好有緣，大家識咗十幾年，但細細個見過之後就一直冇見面，直到爸爸穿紅線，介紹Ken畀我認識。再見到佢真係有啲一見鍾情嘅感覺，佢之後講番都話有咁嘅感覺，好開心大家背景相似，又喺英國讀書，好多話題好啱傾。」拍拖短短日子，王卓淇已視男友為結婚對象：「大家嘅屋企人都好支持，隨緣啦！我覺得自己係閃婚嘅人，哈哈！」公開男友豈非與緋聞男友吳業坤劃清界線？她說：「係o架！同吳業坤一直都係朋友，遲啲會介紹男友畀佢認識。」
