「準人妻」睇AV偷師 孫慧雪婚後繼續做：佢養我唔起
將於本月23日下嫁「富二代」男友Edwin的孫慧雪，婚前繼續密密開工，連續兩日出席活動，前晚先與姜麗文及黃百鳴等在數碼港宣傳新片。以性感打扮稍露事業線的她，在片中飾演名為「波多野雪雪」的日本AV女優，被發達後的林盛斌請到香港與盧海鵬打「友誼波」，她笑說：「係打排球！（扮AV女優，老公睇到眼火爆？）唔會，少少性感。（展現媚態？）係啲衫性感！（有調情場口？）一到戲肉就冇。（睇AV學日文？）我有上網搵波多野結衣嘅片，但只係睇片頭去做功課。」
為蔡思貝做媒
昨日阿雪再度出動，到上環出席聖誕活動搵真銀，她說：「係呀！要賺多啲，星期六、日仲要去澳門做嘢，男友都投訴話我結婚啲嘢仲未搞掂，尋晚安排婚禮座位表都搞到凌晨三、四點。（婚前密密賺？）因為佢講明結咗婚之後，我都要繼續做嘢。（佢唔養你？）係呀！佢養我唔起，講笑啫！」談及「姊妹團」之一的蔡思貝甩拖，問會否介紹兄弟給她認識？她笑說：「佢甩拖咩？我要關心吓佢先，咁真係要嚟我婚禮，好多正嘢！」
