珍妮花同偶像拍拖賺凸！

奧斯卡影后珍妮花羅倫絲（Jennifer Lawrence）今年8月與《黑天鵝》（Black Swan）的47歲導演Darren Aronofsky合作新片而撻着，被拍得當街十指緊扣兼笑晒咀嘴，正式公開戀情！珍妮花日前受訪時，大方讚對方有獨特視野：「自從2010年睇完《黑天鵝》，我就好想同Darren合作，所以今次就算未收到劇本都一口答應邀請。」其後她便飛往蒙特利爾拍驚慄片，怎料就這樣一片定情！

談到未來婚禮，她說：「我全部朋友都正在結婚同生BB，婚禮是好正，但我不會再做伴娘了，我相信自己亦不會搵人做伴娘，我又怎能夠將我的朋友分排名呢？」至於生育大計，她自嘲對愛犬Pippi Longstocking而言，她就像個「精神錯亂的母親」：「我真心覺得自己好失禮！如果可以將牠放進我的肚內生佢出嚟，我都願意，但真係生小朋友就會好『危險』，因為我的小朋友會好妒忌，因為我始終都係留意隻狗多過留意佢哋。」

爆粗鬧愛瑪Friend咗

除了有新戀情外，珍妮花近年與另一人氣女星愛瑪史東（Emma Stone）愈來愈Friend，原來二人經共同朋友活地夏里遜（Woody Harrelson）介紹認識，起初愛瑪非常主動向珍妮花發短訊，但遭珍妮花「潑冷水」，她笑說：「我爆粗回她：『死X開！』，點知就咁Friend咗，足足一年時間每日都會互發短訊吹水，就好似屬於我們的《忘了,忘不了》（The Notebook）一樣，叫《The Notebook：365 Texts》。」

貴為荷里活一姐的她，竟自爆好驚粉絲：「好多粉絲以為認識我，不過當你接近我時，對我來說你完全是一位陌生人，我會好驚。」仲講到明如果在餐廳食晚飯時，有人突然用手機爆晒閃光燈影相，一定會狠狠教訓對方，等其他人懂得收斂，並揚言保護私隱是一份全職工作，會一直努力。

去時裝周勁Down：覺得自己係垃圾

珍妮花貴為國際品牌代言人，加上荷里活一姐身份，自然經常獲邀出席時裝周睇騷。面對如此難得的機會，她卻覺得很大壓力，每次去完，自信心都受到嚴重打擊，就好似今年9月出席巴黎時裝周，她便自爆感到好冇安全感：「真係做人咁耐，最覺得受威脅的一次！你在酒店打扮好，覺得自己着得好靚，之後一出去見到其他人的打扮，同埋7呎高的人，你就會覺得自己是垃圾，我唔會再出去！」

Jennifer Lawrence

出生地：美國肯塔基州

出生日期：1990年8月15日（2 6歲）

代表作：《飢餓遊戲》、《失戀自作業》、《歡姐當自強》

文：外娛組