張繼聰慈父好老公是這樣煉成的！
藝人張繼聰於無綫台慶劇《幕後玩家》演活「玩家」角色，現實中他卻是一等一的「顧家男」，平日工作再忙碌，亦「愛回家」與家人共聚。身為慈父的張繼聰提到仔仔張瞻，坦言會放手讓他成長，更不用他贏在起跑線。同時身為人夫的張繼聰與太太謝安琪（Kay）將踏入結婚十周年，他對Kay「一條心」全賴夠定力，更直言：「如果你同另一半嘅關係好好，好自然唔會有空間容納其他人。」原來這位好老公兼好爸爸是這樣煉成的！
#堅拒體罰：唔使贏在起跑線
藝人張繼聰在無綫台慶劇《幕後玩家》飾演公關公司總監，其角色「Tim少」對住女士們口甜舌滑，經常有女人圍着身邊轉，「玩家」形象深入民心。不過，幕後的張繼聰卻是一名「顧家男」，每日定時定候「愛回家」，只因要從忙碌的工作中，爭取時間與太太謝安琪（Kay）及仔仔張瞻相處，難怪獲網民力讚是一等一好老公兼好爸爸！
張繼聰最近亦成為「吸金王」，先後接拍多個廣告，近日更為瑞士天梭表拍攝讓「忠於自己」傳承的短片，當中以父子情及把忠於自己的精神傳承下一代為主題，令他有所啟發，並分享平日與仔仔的相處點滴。常言道「嚴父出孝子」，不過張繼聰拒絕成為嚴父，反而與仔仔如朋友般相處，並引導仔仔建立正確是非觀，讓他健康成長！他說：「我覺得責罰或者體罰唔太好，亦冇咩效果，反而要畀仔仔學識從錯誤中學習，譬如蝦人係唔好嘅事，等佢經歷過就知唔好受，下次自然唔會再做。」
有錢唔等如開心
做人父母自然憂心子女所有事，身為人父的張繼聰學懂要放手，不會過分管束仔仔，只寄望他成為快樂的人，不用贏在起跑線！他說：「好多人可能搵到好多錢，喺社會上好有地位，但可能個人會有好多缺塊，好多唔完美嘅地方，甚至過得好痛苦，所以快樂同有冇錢唔成正比。可能仔仔嘅際遇同努力，令佢到時好有錢，呢個當然冇所謂，最緊要係佢做到快樂嘅人同識得同人相處。」講到八歲多的張瞻早前公開展示舞技，甚有潛質做藝人，有望繼承父母的職業，開通的張繼聰表示會全力支持仔仔尋夢：「如果佢好明白呢行做緊乜，又好想做演員，我當然會盡量栽培佢，或者畀佢接受好嘅教育。不過如果佢唔清楚呢行，我絕對唔鼓勵佢。」
#夫妻之道：老婆永遠是對的
張繼聰做爸爸稱職，做老公亦絕對冇得彈！張繼聰與Kay人前人後恩愛如昔，為圈中的模範夫妻，皆因他深明做老公的生存之道，就是「老婆大人永遠是對的」，難怪二人多年來甚少摩擦：「如果有一方永遠覺得自己錯晒，就唔會有摩擦啦！（如果有摩擦，你會做低頭嗰個先？）首先我哋冇咩摩擦，因為做老公得一個道理，就係不停講對唔住，總之係咪都係你錯，愈快講對唔住，件事愈快過去。」不過娛樂圈如此大，隨處都有誘惑，張繼聰則靠定力擋住誘惑，更直言：「如果你同另一半嘅關係好好，好自然唔會有空間容納其他人。」
兩個夠晒數
難怪張繼聰與Kay能夠安然度過「七年之癢」，明年更踏入結婚十周年，感情保鮮期如此長，全賴箇中的小秘訣：「其實我成日都會記得同太太拍拖嘅感覺，攞番呢種感覺出嚟，感情就可以歷久常新，所以我唔覺得已經十年，反而係諗『咁快就十年』。」
Kay現時懷有B女，已有一子的二人如願湊夠一個「好」字，對於再度迎接新生命的來臨，張繼聰亦表示興奮，更透露兩個小朋友「夠晒數」：「其實我好鍾意小朋友，但始終生小朋友對女士嚟講要付出好多嘢，尤其是今次睇住太太再度懷孕，見到佢都好辛苦，所以（一仔一女）都足夠。」
#演技獲讚：攞獎係Bonus
家庭幸福美滿，事業亦進入高峰期，講到張繼聰於《幕》劇的演出獲得一致好評，他歸功於全體演員及工作人員：「大家都好鍾意Tim少呢個角色，我當然好開心，因為花咗好多心血去演，但更加希望大家支持成個團隊，因為呢套劇唔只係我嘅功勞，其他演員都做得好，譬如翠如喺演技上有好大突破。（想唔想今年衝擊視帝？）坦白講獎項對我嚟講係額外獎勵，絕對唔係動力，因為我一諗到要攞獎就好有壓力，所以我去參加頒獎禮都係當去party，獎項方面唔輪到我擔心，隨緣啦！」
文：專案組
攝：黎志輝
服裝：kent&curwen
腕錶及場地：Tissot Heritage 1936、The Stadium