林愷鈴遭放屁男嚇窒唔恨拍拖

近年有不少「星二代」殺入娛樂圈，其中一位身材高挑及極具仙氣的便是藝人龔慈恩（Mimi）女兒林愷鈴（Ashley），每次現身均非常搶眼。聖誕節將至，兩母女日前到海洋公園遊玩及於聖誕裝飾前拍照留念。Mimi表示以前經常陪子女到樂園遊玩，記得某年於園內拍攝的聖誕節照片亦用以製作鎖匙扣和磁貼。

冇刻意反叛

問到現年16歲、就讀中五的Ashley於青春期可試過反叛？Mimi指女兒小時候非常聽話：「但佢13、14歲開始會同你講咩原因需要學、我唔太有興趣，我好有興趣邊樣嘢想轉學嗰樣，當佢細個乜都yes時，轉變到會問你、同你討價還價，的確係有唔同咗嘅階段，不過都唔係正式反叛。」Ashley說：「我好清楚乜嘢對自己好，亦知道媽咪係為我好，冇刻意去反叛。」Ashley坦言未試過拍拖：「因為我讀男女校可以認識多啲異性，反而冇女校咁好奇，男仔形象破滅晒，佢哋會上堂鬥放屁再舉手認(口架)！所以我唔會為拍拖而拍拖。」

兩母女無所不談，絕對沒有代溝。

林愷鈴小時候經常到樂園遊玩。

轉口風想入行

Mimi大讚囡囡經過多次出席公開活動後，明顯成長不少：「由開始擔心佢講每一句話，到每一次都都畀到驚喜我，雖然依家佢仲係慢熱，但睇到佢嘅進步。」問Ashley有否興趣入行？過往一直表示「言之尚早」的她轉口風說：「我好肯定自己大個一定會做有關藝術嘅嘢，因為我真係好鍾意藝術，唔一定係畫畫，可能係寫書、寫嘢都非常鍾意，如果唔畀我創作嘅話，我係一個死咗嘅人。娛樂圈有好多關於設計嘅嘢，同創作好有密切關係，無論幕前幕後都係，所以係會有呢個可能性。（想唱歌定做戲？）我覺得唱歌同做戲係分唔開，因為唱歌唔識投入唔會唱到歌，歌手入面都有演員影子。」

文：名人組

服裝：Sindel