無綫加薪派獎金定軍心
《TVB職藝員聯歡晚宴2016》昨晚繼續在將軍澳電視城舉行，筵開約200圍盆菜宴，藝人蔡思貝、楊秀惠、陳智燊（Jason）、李施嬅、許廷鏗、應屆港姐港男及逾2000位台前幕後出席，集團行政總裁李寶安在台上表示無綫正努力發展第三平台，不少人對資源及人工升幅存疑問，李寶安表示獲主席陳國強給予建議，發布加人工好消息以定軍心，承諾升級（升職）員工必獲加人工，沒有升職員工亦有1.5%加幅，農曆新年前有平均一個月月薪獎金。
陳智燊：幫到我交稅！
李施嬅得知加薪消息後，笑言自己也是「星級員工」，但她又聽錯加薪1.5倍，相當搞笑：「加薪係咪1.5倍？我可以買車！（加1.5%咋！）哈哈！都好！過年有多啲錢派利是，我最想抽獎贏到現金，幫黃智雯慶祝生日。」現場見Jason不停被女同事包圍集郵，他笑言太太宋熙年很放心：「同事冇所謂啦！唔使諗咁多，平時去晚會同唔識嘅人合照就會避忌啲。（知唔知加薪？）好開心，返去要研究吓先！幫到我交稅！」至於楊秀惠前晚缺席首晚盆菜宴，昨晚她大騷長腿為女配角獎向同事拉票，非常落力。此外，被傳將離巢星夢的歌手許廷鏗與星夢老闆何哲圖孖住受訪闢謠，許廷鏗指合約仍有頗長時間，而且雙方默契十足。
文：影視組