Aka陳詩欣馬嘉均血光之災
女子組合Super Girls隊長趙慧珊（Aka）、歌手馬嘉均及陳詩欣近日相繼遇上血光之災，均受皮肉之苦！
Case 1：Aka切傷手指
前日Aka上載視頻展示右手手指公近虎口位的傷勢，並自嘲人蠢無藥醫，原來她切蘋果時不慎跣手切傷，不少粉絲都大表心痛！Aka在電話中透露當時傷口不停標血：「個傷口好深，我妹妹做過護士，即刻幫我消毒黏膠布。我以為好番，但掟啲衫入洗衣機時個傷口又爆番，即刻赤赤痛！」平日論論盡盡的她，希望早日找到另一半照顧。
Case 2：陳詩欣篤魚蛋鎅腳
日前陳詩欣遭受無妄之災，練完舞後她打算去篤魚蛋醫肚，穿短褲的她經過小食店時，左邊大髀意外被竹籤鎅出一條4吋長的疤痕，她說：「第一下我唔知，跟住覺得痛，仲流血先發現。依家已經結咗焦，但仲有條疤喺度，好彩冬天可以着長裙、長褲遮住。」
Case 3：馬嘉均耳開刀放膿
馬嘉均在左耳耳骨穿耳環後，傷口紅腫兼含膿，前日要去開刀放膿，他說：「瞓醒見枕頭有血漬，過多排見佢大咗又流膿，忍唔住去睇醫生，醫生話個組織愈嚟愈大，會手尾長，我決定割咗佢。」醫生指手術後或會留有疤痕，他認為男仔有疤痕都OK：「最緊要係割咗佢，大家唔使擔心，依家冇事。」
文：音樂組