何雁詩被逼供捱鬧拒劇透
無綫劇集《致命復活》全城hit爆，有份演出兼唱片尾曲的何雁詩自爆最近不斷被人逼供誰是Big Boss，但她企硬，就算被人鬧都堅持不肯劇透！日前她為片尾曲拍MV時，更獻出MV螢幕初吻，男主角楊潮凱更咀到現青筋！
何雁詩為有份演出的熱播劇集《致命復活》唱片尾曲《愛需要勇氣》，此劇掀起全城競猜誰是Big Boss熱潮，她在劇中飾演性格古靈精怪的Tracy，由於劇情愈趨緊湊，何雁詩自爆身邊人均追問她誰是Big Boss：「大家追埋呢一、兩個星期就會知，我只可以透露最後Big Boss係會認自己係Big Boss。（係咪好易估？）係，如果有睇嘅話，聰明人一定會估到。我近期不斷畀身邊人敲問，但我唔會講，就算畀人鬧都好，我覺得啲人嘅估樣令我好爽，但劉佩玥同陳瀅已經估到。」
獻初吻 冇蝕底
日前拍MV時，何雁詩邀得同劇演員楊潮凱做男主角，她不但要考演技大騷喊功，跟潮凱還有不少親密鏡頭，肉緊攬攬及獻上MV的螢幕初吻！兩人拍咀嘴鏡頭時，潮凱更錫到青筋暴現，十分激動！何雁詩說：「今次係第一次喺MV內拍咀戲，當日一開始已經係拍咀戲，咀咗成十幾次。（咁你咪蝕底哂？）唔係，佢蝕底啲！（你哋一吻定情？）絕對冇！人哋結咗婚，我哋識咗十幾年，佢當我兄弟，喺人哋眼中我係男仔。」在劇中她喜歡王浩信，問到為何不叫對方演MV？她承認有諗過：「但佢好忙，加上唔想MV同劇太似，怕人以為MV係劇集裏面剪出嚟。」
文：音樂組