梁朝偉挑戰高妹駁腳親熱

梁朝偉與金城武兩大男神在新片中齊演喜劇,與張榕容、杜鵑等高挑女演員合作,譜出長短腳之戀的偉仔自爆要企木箱談情。而陳奕迅接受電視訪問,對於與「偶像」偉仔演出大感興奮,更自爆被導演摸大髀!

影帝梁朝偉在新片《擺渡人》中與金城武、陳奕迅、張榕容合作,今次是偉仔與金城武繼《赤壁》後再度合作,今次齊演喜劇,偉仔笑言感覺有趣:「今次合作好有火花,不過大家跟番劇本,冇爆肚。」

高矮配情侶檔

偉仔透露今次與杜鵑演一對,金城武配張榕容,陳奕迅則與熊黛林拍檔,眾女演員都高人一等,面對1米77的名模杜鵑,原本不算矮有1米71的偉仔,都自爆為配合鏡頭而要企木箱演出,與女方有點到即止的親熱戲。講到多年未有拍喜劇,之前多拍沉重題材的偉仔直言拍喜劇相當開心,情緒上亦有較多釋放。問到是否愛開玩笑?偉仔說:「每個人都有好多面,有嚴肅、有童真,我有時都會搞吓鬼。(喺嘉玲定朋友面前?)會整蠱朋友多啲,平日大家多數睇到我嚴肅一面啫。(太太劉嘉玲接受?)冇得唔接受,我冇試過整嬲人。」

陳奕迅被摸大髀

另外,偉仔與陳奕迅之前現身有線節目《電影蒙太奇》,陳奕迅對於能與偉仔合作大感興奮。講到導演張嘉佳曾表示將自己最喜歡的演員都放在此戲中,陳奕迅笑言對方初次見面已相當熱情:「佢係咁摸我大髀,我心諗第一次見面咋!」

文:影視組