謝霆鋒幫襯小店食平西

謝霆鋒近年主持美食真人騷節目《12道鋒味》，有極大回響，成功豎立「型男廚神」形象，而醉心廚藝的他不時「食好西」，歎盡山珍海味貴價美食，不過霆鋒近日難得回港，見他連日與友人外出搵食時，都喜歡捐窿捐罅幫襯平民小店「食平西」。

唔介意地方淺窄

日前下午，戴帽、身穿牛仔褲的霆鋒，打扮樸素，與友人現身灣仔一間平民食店醫肚，見他甫入店即揀選了背對大門口的位置坐下，但仍引來不少目光，親民的霆鋒表現隨和，還跟其他食客點頭打招呼。期間霆鋒即使與鄰座食客因為地方淺窄膊頭撞膊頭，他亦未有介意，大啖大啖品嘗店內的招牌泰國麵，逗留約半個多小時便埋單離開。

霆鋒醫飽肚後一臉滋味，笑笑口步出，問及女友王菲之前眼部受傷一事，霆鋒聞言笑說：「哎吔，又問呢啲！」說罷便離開。

謝霆鋒到灣仔一間平民食店醫肚，背門而坐的他低頭大啖食麵。	放大圖片	日前霆鋒到中環搵食，只是換了牛仔褲，帽同外套完全冇換。

39萬人搶王菲門票

此外，天后王菲將於本月30日在上海舉辦《幻樂一場演唱會》，早前有不少售票謠言傳出，傳黃牛黨更開出天價60萬人民幣一張飛及100萬人民幣兩張飛。內地網於昨晚八時公開發售部分門票，每人限購兩張，結果吸引39萬人湧入網站，門票迅速售罄，天后的魅力果然驚人！

文、攝：追蹤組