何浩文 唐紫睿 捱批當佢唱歌！
藝人作為公眾人物，擇偶條件會以圈內還是圈外人為首選？面對外界種種批評，究竟如何處理這些壓力及負面情緒？同屬蕭定一「GME中國」旗下的藝人何浩文（Dominic）及唐紫睿（Hazel）難得聚首一堂，由愛情觀講到面對批評的妙計，師兄妹各有各睇法，唔知仲以為嗌緊交！
Round 1 揀情人圈內Vs圈外？
唐：其實搵對象最緊要適合大家，我覺得心地善良、有上進心最緊要。我本身想35歲生小朋友，係一個人生踏入另一階段嘅開始。你希望另一半係圈內定圈外人？
何：其實我想搵圈內！因為對方會明白呢行係點，就算入行咁多年，父母都未真係明白我做緊咩或為咗咩！之前有朋友同我講：「拍乜鬼《鴨王》，唔係你拍嘅嘢，點解拍嗰啲？」我問佢哋唔覺依家多咗人識我咩？呢個就係其中一個成功嘅Step，但圈外人未必明白，同行嘅人就會明呢個係一個好好嘅工作機會。同圈外人拍拖嘅好處係可以傾一啲完全同娛樂圈冇關係嘅嘢。
有共同話題畀意見
唐：圈內、外我都試過，覺得同圈內人係有多啲共同話題，但有時會有比較，或者有好多意見，感覺唔似休息緊！如果另一半係圈外人，返去可以聽佢講吓我唔知嘅嘢，拍拖嗰陣暫時跳出框框，咁先係休息。
何：我係一個唔想停落嚟嘅人，如果傾一啲同我工作完全冇關嘅嘢，我覺得自己停咗！我想另一半就算教唔到我啲咩，都可以分擔到呢行嘅諗法，我想佢聽完會明，唔需要講啲咩，明白大家已經好夠。當然感情嘅嘢係好老套，要嚟嘅時間就嚟，冇得去揀，要圈內定圈外？要高定矮？要肥定瘦？一切睇時機。
Round 2 結婚係向家人交代？
何：我係一個好想結婚嘅人，本來想30歲結婚、31歲有第一個小朋友。好多港人覺得要有層樓先可以結婚，我當然希望同最愛有安樂窩，但唔係最必需！我身邊好多朋友結咗婚、有埋小朋友都係租樓住。
唐：愛情之後就係建立家庭，始終女人要一份安全感、一份承諾，所以婚姻好重要，係一生一世嘅承諾，亦係對屋企人或雙方家庭嘅交代。我係嫁畀一個人，唔係層樓，唔會因為對方冇樓而唔嫁畀佢，一段婚姻係建喺愛情之上。最重要夠上進同勤力，將來一定養得起老婆仔女。
認傳統望一生一世
何：坦白講，結婚係兩個人之間嘅事，我唔同意要向雙方家庭交代呢點！倒轉諗，如果我係爸爸，我唔會係陪個仔或女過世嘅人，係佢哋嘅事，所以結婚係對你另一半負責任，對大家新嘅家庭負責任。作為爸爸，咁樣已經好足夠，唔需要對我做任何交代，活得好就係對我最好嘅交代。
唐：雖然依家一紙婚書唔代表啲咩，但對我嚟講如果選擇嫁畀個男人，無論對方富貴又好貧窮又好，健康又好病又好，我都選擇跟佢一生一世，喺呢方面我比較傳統。我覺得兩個人一齊，唔使特登去慳錢，應使得使。我希望另一半係同我努力搵錢，而唔係努力慳錢，因為我覺得錢係搵番嚟，唔係儲番嚟。
Round 3 畀人鬧硬食做鵪鶉？
唐：做藝人有時會受好多委屈，無論工作或受外界批評，你係咪會忍唔住「爆」佢？你平時都有好多偉論發表！
何：其實我唔係好鍾意解釋，平時嗰啲叫「說明」，同解釋係兩樣嘢，有時需要說明就會出聲。Haters永遠都存在，對我嚟講Haters係等於Losers，佢哋想將成功嘅人拉落佢哋嘅Level度，所以愈多Haters證明你做緊嘅嘢愈啱。連影帝級黃秋生、劉青雲都畀人批評戲渣，有Haters係好，但都要睇做緊嘅嘢啱定錯，唔通殺人放火有Haters就啱咩？
唐：我係一個唔鍾意畀人屈嘅人，所以初時反應比較激動，唔開心到喊同瞓唔到覺，但慢慢發現呢個係做藝人嘅Package！有啲事情發生好多次就會麻木，亦明白做咩事都會有人評論。好多人睇嘢好表面，冇人Care個事實。
何：唔係睇表面咁簡單，仲會喺件事上面再加個人諗法，例如有人問我會唔會追嗰個女仔，我答「咁佢跑我咪追囉」，啲人就會話「咁即係追啦」，其實我冇講過！每人都有副有色眼鏡，我覺得Creative都係一件好事，可以推動到你。
唐：有經歷的確令個人變得Strong啲，我依家好醒，見人講人話，見鬼講鬼話！有時當笑話聽，其實啲人只係想引你注意。
何：佢哋係希望得到其他人嘅認同！其實呢個社會有個病態，唔好話藝人或者YouTuber、網紅，就算普通人都會在意自己平台嘅「Likes」。我有朋友話「影同一張相，你有幾千人Like，我先得幾十，唔Post啦」，又係想得到人認同嘅事例。
後記：喜愛股你唔到！
Dominic經常拍下生活點滴，然後上載到個人YouTube頻道與網民分享，連接受本報專訪當日仍帶同私伙相機，拍下受訪過程及鏡頭外的花絮。未埋位時，愛搞鬼的Dominic突然「手痕」，舉機向正在專心撳電話的Hazel問：「你喺度做緊咩？」原來Hazel分秒必爭地留意股票消息，估不到她除了打得之外，投資方面也有一手！
場地：Schnee German Restaurant
文：馮雪怡
攝：張福宏