鄧佩儀曳曳 追剪哥哥
前華姐冠軍鄧佩儀在加拿大溫哥華長大，有着一個快樂又充實的童年，家中有一個感情要好的哥哥作伴，小時候活潑的她最喜歡黐住哥哥玩，經常整蠱他，她笑說：「我同哥哥感情好好，細個我曳過佢，成日追住佢玩，仲試過剪佢啲頭髮，哈哈！」鄧媽媽最喜歡帶兩兄妹到影樓影相留念，但鄧佩儀卻不喜歡，更顯示倔強一面：「啲相好似影婚禮相咁，細個好唔鍾意影相，自己唔會笑，攝影師、媽咪用盡辦法去氹我都唔笑，影出嚟張張相仲要握住拳頭，好嬲咁，依家睇番都好好笑。」
由小學、中學到大學入讀英屬哥倫比亞大學（UBC），鄧佩儀也是校內的活躍分子，自言是非常鍾意返學的學生，興趣多多積極參與課外活動，包括啦啦隊、田徑、籃球，也贏過不少地區獎項。最開心是中學代表學校啦啦隊出國比賽，成班同學在酒店傾偈玩通宵不願睡覺。讀書時活躍的性格令她走上選美之路，大學參加電台DJ比賽，在芸芸參賽者中打入八強，隨後參加華姐選美奪得冠軍。
