星魅博：帽子戲法 鄭希怡襯得最醒神
東網巨星全新娛樂節目《星魅博》播出後反應熱烈，每一集都會找來一位資深時尚人，品評圈中名人明星的穿衣配搭，並會就每集主題提供小貼士，讓大家能緊貼潮流。今集再度邀請到本地時裝設計師鄧達智William，就經典的「帽子」配飾做研究評論。William認為歐洲人五官突出，戴帽亦較討好，而亞洲人戴帽就要特別小心。以身材高挑的鄭希怡為例，選擇網狀帽子配搭白色性感喱士bra top及jacket，再襯上完美剪裁的同色褲，十分醒神！而內地女星唐嫣將帽子錯配晚裝裙，就顯得感覺怪怪。
黃翠如
「翠如BB呢頂帽就咁睇好似娘娘哋，但同條粉紅裙放埋一齊就非常之正，顏色外形各方面都好配合！」
唐嫣
「唐嫣頂帽同條裙，兩樣嘢分開嚟着係好靚嘅，但放埋一齊就有啲問題。呢頂帽唔係配呢類長裙晚裝，如果係晚裝嘅帽，咁可能配細頂啲嘅帽，會更加啱！」
鄭希怡
「鄭希怡呢套係由頭正到落尾，網狀形嘅帽加上bra top入面嘅laces，同件jacket個領完全脗合，望落去好醒神！」
湯怡
「湯怡呢條裙好outstanding，頂帽個設計有啲法國式嘅東方味，好似越南人戴嗰啲竹帽咁，呢個就網織，裙同帽放埋一齊個味道相當之夠嘅！」
Ana R.
「Ana R.呢頂帽設計好有藝術感，加上條裙好簡約，配合佢混血兒突出嘅五官，完全相得益彰！」
