鍾舒漫 許靖韻 變濕豬

歌手鍾舒漫（Sherman）、許靖韻及陳凱彤昨日組成「音樂與豬」參加飛行日活動，三人穿上粉紅小豬裝上陣，並在跑道上上演被豬肉佬追斬的情節，之後Sherman與許靖韻就負責推飛行器上的陳凱彤由6米高台飛落海，兩人猶豫一輪後，才跟着陳凱彤跳落海，變成三隻「濕豬」！

淆底想縮沙

受訪時，三人對於第一次「跳海」大呼好玩！陳凱彤表示落水時感受到飛行器正解體，但滑翔器卡住了她的豬仔頭盔並壓住她，令她被迫飲了四大啖海水。許靖韻笑言一開始承諾會三人一起飛落海，但她與Sherman卻一度淆底想縮沙：「陳凱彤坐喺飛行器上反而冇咁驚，因為我哋推佢，佢係被迫，我同Sherman去到臨落去嗰度就開始驚喇，就企咗喺度！」Sherman亦笑說：「因為我哋未見過個台，冇諗過咁高，有一吓覺得不如算啦，但呢啲場合大家一條心，跳係應該嘅。」

陳凱彤雀躍坐上飛行器，準備起飛！

待救上岸 鍾舒漫、許靖韻

至於可會有下一次？三人異口同聲說一定會：「我哋玩完之後，都商量過出年整個更大、更有規範嘅飛機。」又笑謂已約好再一起做其他極限挑戰：「Skydiving、Bungy jump嗰啲，繼續極限挑戰！」

Sherman有得着

Sherman又表示這次參加飛行日活動很有得着：「最大得着除咗我哋三個人合作嘅過程，同埋有啲嘢你覺得好恐怖，但你決定咗去，其實都係得一吓啫，冇乜嘢嘅！」

狂飲海水 鍾舒漫、許靖韻

陳凱彤被滑翔器卡住頭盔，沉喇！

文：音樂組　

攝：司徒國榮