瘦嬌護Cup成功 阿Sa葡萄

【衛紫敏澳門直擊】組合Twins前晚在澳門威尼斯人金光綜藝館舉行《#TWINS#LOL#世界巡迴演唱會》澳門站，英皇老闆楊受成、阿Sa父母、阿嬌媽咪、張致恒與泰國男星Mike捧場。今次舞台有別早前的紅館站，「T」字舞台可與歌迷拉近距離。Twins邊唱邊跳《着睡衣跳舞》揭序幕，在台上回憶未紅時：「澳門係我哋十六年前第一次演唱嘅地方，當時連（組合）名都冇，司儀係用『香港最有人氣組合』嚟介紹我哋出場。」

Twins吊到半空合唱冇怯場。	Twins勁歌熱舞，令全場氣溫急升！	張致恒暗示唔再做師弟，嚇親阿嬌！

張致恒暗示唔做師弟

剛踏入34歲的阿Sa對Twins成軍十五周年感觸良多，當唱完《我們的紀念冊》時，本已眼濕濕的她轉身拭淚並說：「見到台下歌迷太令人感動！」阿嬌則帶領全場觀眾補唱生日歌冧阿Sa，搞到對方又想喊又想笑：「收番（眼淚）入去先，要開心啲！今（前）日係我3年零4個月嘅生日，喺度祝每一個人開開心心，繼續愛我哋。」

尾聲時，Twins見張致恒（Steven）在台下捧場，即拉他上台合唱《死性不改》。Steven笑言缺少拍檔關智斌（Kenny），阿Sa抵死地說：「嗰個橫店『老臘肉』？」合唱過後，Steven感謝兩位師姐十五年來的愛護，坦言不知日後是否可繼續做師弟，阿Sa即打圓場：「唔好講呢啲！我哋祝你前程錦繡。」其後，Twins獻唱最後兩首歌時又忍不住落淚。

蔡卓妍	阿嬌瘦咗，上圍依舊笑春「峰」。	老闆楊受成與泰星Mike捧Twins場。

打側手翻贏番自信

騷後，Twins受訪時指當年參與英皇的澳門群星騷，同場有容祖兒與謝霆鋒等多位前輩級歌手，因未正式出道故連隊名都未有：「台下係零反應！真係『零』舍嘅激氣，後尾打完個側手翻就贏得全場掌聲，自信返晒嚟！」提到阿嬌清減不少，她透露與賀爾蒙出問題而食得清淡有關，一下子瘦了20磅，問到「咪咪」可有縮水而換內衣？她笑說：「以前係有啲逼爆感覺，依家係正常！之前真係自己都頂唔順嫌大！」搞到「iPad胸」阿Sa勁無癮說：「喺我面前講呢啲，好囂張呀！」至於Steven是否已約滿英皇？兩人稱第一次聽到，留給當事人回應。

文：音樂組