張頴康坎坷過後「絕世好老婆」接機放閃
「三寶」張頴康憑《一屋老友記》成功彈起兼入屋，童年時遭母親遺棄、入行捱足十六年終首奪從演以來首個獎項的他，前晚在馬來西亞舉行的星光薈萃頒獎禮奪「飛躍進步男藝人」殊榮，全城Like爆，他在台上發表愛妻宣言，感動不少人，又揚言：「我腦海裏面只得我老婆！」昨日他返港，獲「絕世好老婆」麥雅緻帶囡囡來接機，在機場大晒恩愛。
張頴康入行十六年，前晚在《TVB馬來西亞星光薈萃頒獎典禮2016》奪得入行以來首個獎項「飛躍進步男藝人」的他，在台上激動表示十六年來只是有份睇卻無份參與頒獎禮，更即場發表愛妻宣言，對老婆麥雅緻高呼：「我永遠愛你！」場面感動，博得全場掌聲。
張頴康出道後於2006年加入TVB，不過一直做閒角，前晚他在頒獎禮透露六年前想成家立室，故一度轉行做文員望有穩定收入，卻因一場車禍令他「回心轉意」，2011年回巢TVB後拍了不少佔戲較多的重要角色劇集如《回到三國》、《貓屎媽媽》、《愛我請留言》及《天眼》等，今年他參演的《一屋老友記》及《城寨英雄》收視及口碑俱佳，其中於《一屋》飾演的「三寶」角色討好，而且戲份重，助他勇奪「飛躍獎」。阿康如此錫老婆麥雅緻亦不無道理，除了老婆一句讓他放心去追夢，不需要擔心錢的問題外，他亦曾自爆母親在其4歲時離他而去，尋母多年卻未成功，麥雅緻一直在他身邊支持及扶持，如今阿康捱出頭來，當然要發表愛妻宣言。
有提名都開心
阿康奪獎後直言如果沒有太太就冇可能做到演員，感激對方不介意自己「搵得少」，並說：「仲要多謝外父外母，老婆花咗好多唇舌說服佢哋畀個女嫁畀我，我腦海裏面只得我老婆！」不過笑指太太不讓他「寵幸」，他說：「都有同佢講過話生多個，佢話唔好掂我，希望佢可以啦！頭先都問楊明係咪攞飛躍後戲份會多啲，佢話係，戲份多啲收入多啲，咁可以生多個啦！」並謂奪馬國飛躍男藝人已心滿意足，若有份提名台慶頒獎禮已經很開心。
邊睇直播邊喊
昨日阿康返港，獲麥雅緻與囡囡接機，他直言第一時間能見到太太很開心，又想即刻拿出獎座給她看，還爆料指太太看直播邊睇邊喊：「連工人都喊，個女就問點解爸爸喺電視、幾時返。」又冧爆指不吃羊的太太準備陪佢食羊腩煲慶祝。談到他奪獎的新聞在東網的點擊率很高，阿康說：「尋日上網唔係收得幾好，好多留言同短訊都未睇到，鄭俊弘話我知好多人洗版！」而同場的呂慧儀亦獲老公黃文迪帶兒子接機，兩位小朋友碰頭打招呼，但呂慧儀笑言不會於機場與張頴康對親家。
文：影視組