郭晉安長期抑鬱 瞞老婆食安眠藥
郭晉安為今年的壓軸台慶劇搏到盡，由深山野人漸變成復仇魔鬼，過程令他吃不消，更因角色太「入血」而搞到要食安眠藥！開工時長期撻着「抑鬱Mode」的他，自爆時刻累積哀傷，但不敢抱頭痛哭：「戥自己嗰10年好悲傷！」將身心推向極限的他，有望成為首位四屆視帝，創造歷史！
永不停步！目標終身成就獎
藝人郭晉安先後憑無綫劇《戇夫成龍》、《阿旺新傳》及《忠奸人》三度榮登視帝，與黎耀祥、羅嘉良攜手保持紀錄，演技絕對是金牌保證！2015年拍攝清裝劇《末代御醫》後，他磨劍接近一年，為今年的壓軸台慶劇《致命復活》做好十足準備，不但開鏡前地獄式減肥搣走20磅肉，更遠赴越南拍攝被綁架兼禁錮於山洞的戲份，每次「犧牲色相」變身披頭散髮的深山大野人，都要化妝化足兩粒鐘！劇中被囚10年的他，不惜為吊命而生吞毒蛇，更因追查真相而漸漸踏上復仇之路，由畫面到演技都直逼極限，他有望破紀錄成為首位四屆視帝！
睇好勁敵王浩信
適逢《致》劇結局播出翌日撞正《萬千星輝頒獎典禮》，令安仔變成「程咬金」，比其他準視帝更有力問鼎本屆「最佳男主角」，而他亦坦言贏面有可能增加：「但都要觀眾睇得投入、欣賞套戲至得，唔係話近頒獎就贏到！記得2003年，阿旺（《戇夫成龍》）都係年頭播，所以觀眾會公平公正咁投票。（睇好邊個？）我睇好王浩信喺《EU超時任務》個『渠頭』，唔係因為同佢合作，係因為我真係有睇，睇到佢有層次、有用心！（唔想四度做視帝？）我唔會停喺度，我會繼續做，做到TVB頒終身成就獎畀我為止！」但他強調並非為爭獎而拍劇，最重要是享受拍劇過程。
挑戰極限！索性唔抽離角色
安仔在《致》劇的角色經歷常人難遇上的浩劫，他表示開鏡前已經知道會拍得很辛苦，但整個過程依然超出自己想像：「之前拍古裝劇試過笠頭套，又要打得咁緊要，都估到會辛苦，但呢套真係預計之外，挑戰緊我嘅體能同精神。（難度好大？）係，因為佢有第三條路揀，唔係得忠同奸！（如果自己畀人咁陷害，都會咁報仇？）一定係等法律制裁(口架)啦！捉到個兇手，唔通我真係走去隊佢咩！」他坦言接拍前認真考慮過自己能否應付：「上年9月一個朝早，阿Lam（監製林志華）打電話畀我，話有個角色畀我，我聽完個古仔話真係要諗諗，遲啲答覆你，我要準備啲咩，仲有冇體能可以做到。（覺得自己老？）未必係年紀上，而係你喺唔夠瞓嘅狀態下，可唔可以駕馭到呢個角色，可唔可以控制到自己做好呢個戲。」
角色如此複雜，問是否難以抽離？想不到連經驗豐富的安仔亦坦言難度非常高：「所以我索性唔抽離！一返屋企就瞓覺，有陣時瞓唔到就食安眠藥！其實都係一粒起兩粒止，唔會長食，係有時拍完場戲個人好Hyper，一定瞓唔着。（老婆歐倩怡唔擔心？）唔畀佢知啦梗係！」
Sad都唔敢喊
拍劇期間長期保持住「韋逸昇Mode」的他，每次在電視城泊好車便自動入戲：「行緊入廠時，個角色就走咗入我身體度，即刻戥自己嗰10年好悲傷，好想喊一場！但我唔畀自己做呢樣嘢，因為一喊個人就會『Gur咗』。」更踢爆同劇的王浩信及萬綺雯同樣開着「抑鬱Mode」：「但大家都照樣好似平常咁互相關心，扮冇嘢，哈哈！」
演技進步？只會更好更好
經典劇《創世紀》最近重播，談到角色「馬志強」同樣要報仇，他說：「《創世紀》舒服好多！志強係一個深明大義嘅人，唔會將啲嘢擺過夜，知道好朋友有份燒死佢阿爸阿媽時，佢都接受命運，因為知道友誼難能可貴，佢都原諒。（依家演技好咗好多？）咁一定有分別，演技呢樣嘢只會更好更好同更好，冇話依家就係最好。你叫我睇番轉頭，當然我知道有好多問題，但觀眾未必睇到，係我自己先知。」他認為人生每個階段，包括結婚、生仔，都會影響思考及演繹方法：「睇一個問題唔同咗，演戲都會豐富咗。」
文：影視組
攝：黎志輝