Coffee逼男友撐場搶蕊蕊風頭
藝人林芊妤（Coffee）昨日出席活動時風騷放閃，自爆圈外大隻男友陪她到場，更攬住甜蜜合照，搶晒老友陳蕊蕊風頭！至於與金剛分手後的蕊蕊直認有追求者，擇偶條件是圈外人，也抗拒再將戀情高調張揚。
林芊妤（Coffee）、陳蕊蕊、鄧穎芝及羅孝勇等昨日出席彈床融合閃避球的運動競賽，競賽結束後，Coffee孖蕊蕊一齊受訪，談到感情問題，Coffee自爆男友Weng在場：「我男朋友喺度。」迅即成為記者「人肉搜尋」的焦點，搶去眾星風頭！見男友怕醜閃避，Coffee即上前護駕，其後Weng亦大方攬着她合照。據知，手瓜起(月展)的Weng是馬來西亞華僑，現為一間銀行的副總監。
風騷認晒命
拍拖一年的Coffee透露平日兩人會一齊做運動，她風騷笑說：「今日我逼佢嚟，平時我做嘢佢唔會嚟，今日星期六佢放假，我夾硬扯佢嚟，佢好唔願意，佢好怕醜好驚尷尬，但佢好好，好開心佢真係陪我過嚟，頭先仲幫我影相，好Sweet！」更搞笑地承認晒命。
至於蕊蕊早前透露有追求者，問聖誕是否已有約，她笑說：「未呀！仲有成個月。（準備好迎接新戀情？）慢慢啦！都唔急，我想專注事業。」她希望將來揀個圈外人，又承認抗拒公開戀情：「我不嬲唔鍾意咁揚。」蕊蕊透露與舊愛金剛已沒有聯絡，問能否做朋友，她說：「其實我真係冇嘢嘅，但唔知佢點諗，始終冇聯絡冇溝通，我諗要畀啲時間佢啩！」此外，問到跳彈床是否感到「負擔」？她笑說：「跳嗰刻唔覺，通常做運動都會戴運動Bra好啲嘅。」
文：音樂組