展鵬 定欣 封帝后唔肯咀
被喻為無綫台慶頒獎禮前哨戰的《TVB馬來西亞星光薈萃頒獎典禮2016》昨晚在馬國舉行，賽前大熱陳展鵬與胡定欣再下一城勇奪帝后，成為全晚大贏家！大會司儀鄭裕玲促這對緋聞男女咀嘴，但兩人未有就範。
【陳永峯馬來西亞直擊】多位無綫藝員昨晚在馬國出席《TVB馬來西亞星光薈萃頒獎典禮2016》，全晚頒發多個獎項，緋聞情侶陳展鵬與胡定欣繼早前成為新加坡「星和」視帝、后後再下一城奪獎，兩人全晚狂擸獎做大贏家，非常威水！
展鵬去年憑《張保仔》贏得「星光」視帝，視后則由定欣及田蕊妮憑《鬼同你OT》瓜分。今年，展鵬再憑《城寨英雄》中「拳佬」一角撼低歐陽震華、王浩信與鄭嘉穎等冧莊，而近期在《致命復活》中有超班演出的郭晉安因劇集於投票期間仍未在當地播出而未有入選。在馬國甚受歡迎的展鵬表示去年未能出席上台致謝，今年很高興再有機會得獎：「馬來西亞係我重要老家，我有兩個婆婆都喺度生活，相信係佢哋眷顧住我。」他又多謝高層曾勵珍及《城》劇台前幕後，最後多謝母親：「我一世都還唔到畀你，要留番下一世！」
真空上陣騷胸光
定欣憑《城》劇「刁蘭」一角再封后，身穿紅色西裝褸的她真空上陣騷胸光，非常性感！宣布視后一刻全場鼓掌，她致謝詞時神情頗平靜：「見到好多同事得獎，令我勾起唔少回憶，呢五年嚟我冇間斷出席呢個頒獎禮，由新人、女配角、角色獎到上次有半隻腳得到女主角，我應承過朋友，要憑自己能力再踏上呢個台！」她又多謝《城》劇監製、演員、武術指導及其健身教練。
《城》劇贏獎 冇人拎獎
螢幕情侶獎由展鵬與定欣以及《EU超時任務》的王浩信、朱千雪齊齊贏獎，大會搞氣氛安排「心形鏡頭」着兩Pair人咀嘴，但他們都扭扭擰擰，最終兩男扮咀打圓場。而展鵬及定欣奪劇集歌曲獎時，司儀鄭裕玲（嘟嘟）再三要求兩人錫錫，但兩人未有就範，展鵬笑說：「錫得多唔值錢o架！」當嘟嘟與陸永被「心形鏡頭」攝入鏡時，兩人無奈愈哄愈埋，最後當然未咀到已急急彈開，嘟嘟更鬧陸永：「好驚呀！你好似真係想咀埋嚟！」笑爆全場。
至於「最喜歡TVB電視角色」獎共16個，展鵬、袁偉豪及伍允龍（Philip）三人得獎時開心得攬埋一舊，入行首奪演藝獎項的Philip致謝時更激動口震。此外，《城》劇獲頒劇集獎眾星致辭後，竟冇人記得拎走獎座，發現此事的Philip尷尬出「彈弓手」猶豫是否要拎獎，相當搞笑。
文：影視組