胡敏珊再搞生意落區Sell客
曾造錶做到被封為「鐘錶界美女」的胡敏珊，消失近三年，近日突然回歸並轉營代理牙膏，昨日她現身銅鑼灣視察業務，還主動向客人力sell產品。
胡敏珊（Christie）突然在社交界銷聲匿迹，只不時更新社交網，上載周遊列國的照片，踏足過印度和西藏等地，在港「消失」近三年終於「復出」，身邊朋友都形容她判若兩人，以往愛斯文CEO裝扮的Christie，如今染了一頭金髮，驟眼看甚似韓星李多海。重返香港後，Christie棄做腕錶生意，轉做代理美白牙膏，變得低調少公開露面。
承認失敗企業家
昨日金髮Christie單拖現身銅鑼灣吃西餐，其後會合一女性友人，徒步行到灣仔進入化妝品店，原來早前其代理的Li-ZEY萊思藍光光速美白牙膏找來張繼聰拍的廣告照就在店內，她在廣告前指指點點，期間有女客人主動跟Christie閒聊，三個女人雞啄唔斷，似是力sell其產品，眾人逗留十幾分鐘便離開。
對於造型上大改變，Christie受訪笑說：「自己鍾意咪OK！」對於三年前放棄造錶，她淡然地說：「生意要完就完，公司唔好就唔做，生意唔做好小事。曾經有人話過冇七次失敗都唔算真正企業家，跌幾多次唔緊要，最緊要起番身，我本來就乜都冇，遊戲完咗就玩另一個。」她指結束生意後，走訪印度十多個城市，在西藏逗留一段長時間作靈修：「好想問自己搵緊乜？覺得以前咁忙，冇好好同自己生活，嗰時靜落嚟，聽吓心裏面把聲，突然醒覺，應承自己出番嚟要做番自己。」
文：名人組