展鵬山聰真功夫搶槍天殘腳飛刀

無綫小生陳展鵬與陳山聰日前為無綫新劇《同盟》開工，兩人分別與武師拍攝打鬥戲份，展鵬早前左耳受傷，處於康復階段，但仍毫不錫身地與武師埋身肉搏，拳來拳往，更徒手搶去對方的手槍！展鵬搏到盡，結果拍攝兩Take就完成拍攝。

謙稱未夠班做打星

他透露最近埋牙應付多場動作戲，起初有「就住打」，為免左耳傷口爆裂。問到再拍對打戲，緋聞女友胡定欣可有感到壓力？他說：「我哋嘅打戲開始少，主要係同武師打多。其實同女仔打有一定難度，佢都算叻，今次套劇要求速度快，短而有勁，佢都OK！」問到是否想轉型做武打演員？他坦言未夠班，笑指心目中的打星是成龍及李連杰。

另一邊廂，山聰徒手搶奪武師手上的刀仔，又來一招「天殘腳」撐到對方滾落地，未埋位前多次試位。他透露今次有多場打戲，體力嚴重透支，幸而平日有跑步習慣，現時尚可應付。

展鵬帶傷上陣卻未有就住打，同武師埋身扭打。

展鵬（右）同山聰連場打戲，搏到盡！

埋位即興加咀嘴戲

山聰透露與姚子羚有感情線，劇中不乏親熱戲：「本身同子羚好熟，所以拍談情戲時大家都易投入，好放。記得有場求婚戲，排嗰陣係冇需要Kiss，但到真正Roll機時我哋就爆肚加咗，成件事好自然！」

文：影視組