袁偉豪：我冇資格講復合

近日分別宣布「分」訊及婚訊的袁偉豪和王君馨（Grace），昨日與黃宇詩於中環出席活動。袁偉豪被問到日前與岑杏賢（Jennifer）分手，並暗示是自己「做錯事」令對方傷透心，但已獲對方原諒：「我想同其他受影響嘅女藝人講聲對唔住，唔好意思。我同Jennifer關係裏面有地方不足，傷咗佢心，令佢失去安全感。佢好大量原諒咗我，我哋係好朋友。（從來冇做過對唔住岑杏賢嘅事？）關係上有不足，細節唔講，佢原諒咗我。」

自責有脾氣不懂珍惜

袁偉豪自責不懂珍惜岑杏賢：「佢係好好、好好、好好嘅女仔。係我唔懂珍惜佢，日後嘅事將來先算。」他指現階段冇資格去諗復合：「點樣挽留，有冇信心佢返嚟就要睇時間，重新認識對方。我哋多年來性格上不斷有磨合，佢好就我，係我有脾氣。（有意復合？）呢一刻我唔敢諗，冇資格講，做好自己先。」談到黃智雯、Grace及龔嘉欣等分別被指是袁偉豪分手的導火線，問他平日可有對異性有所避忌？袁偉豪表示相熟的朋友會心照，但坦言日後會適當地避忌，又表示目前與岑杏賢尚有聯絡，會互相支持。

袁偉豪自責未能給岑杏賢安全感。	甩拖的袁偉豪唔願受訪？原來係見地上有嘢，叫大家等一等先再影相！	王君馨與袁偉豪同場冇尷尬，笑得開懷。

王君馨物色行禮地點

至於日前宣布結婚的Grace透露希望明年成婚，目前仍在尋找合適的地方行禮，而簽字日期待定。問Grace會否請來一班Amazing Esther好友如鍾嘉欣及岑麗香等擔任姊妹？她說：「特別係嘉欣比較少喺香港，其他姊妹又忙工作。（要嘉欣做姊妹？ ）希望請到佢，佢係我圈中最好朋友之一。」而對於有報道指袁偉豪曾為她與岑杏賢多次嘈交？Grace強調與袁偉豪只是工作夥伴，亦祝福對方盡快搵到另一半。

同場的黃宇詩談到昨日是父親黃霑逝世12周年，不禁講到眼濕濕，並直言懷念對方。

文：影視組