黃宗澤賤男犯眾憎視帝唔敢諗
由黃宗澤（Bosco）、龔嘉欣和劉佩玥主演的台慶劇《幕後玩家》，本周高潮位隨着男方被鬧賤男，搞大「小三」個肚再飛正印，三角關係刺激高收視及引起網民熱烈討論，Bosco表示對視帝一獎睇得唔重，反而推舉嘉欣憑演技可贏「女配」，他又自爆劇中兄弟提醒他要請保鏢保護！
之前獲讚「型男」的黃宗澤因無綫台慶劇《幕後玩家》本周劇情轉變而慘變「賤男」，高潮位發生在Bosco與劉佩玥（Moon）的私情，做「小三」的Moon懷着身孕高調向正印攤牌，「正印」嘉欣喊功了得更被激讚，不少觀眾及網民看得肉緊，多場重點戲攀上當晚最高收視之位，分別為劇中黃宗澤阿媽馮素波被車撞死和「小三」Moon入靈堂場口，收視高達26.4，即接近171萬觀眾；另一場講「賤男」Bosco與老婆嘉欣在飛機上攤牌離婚，收視則達25點，有162萬觀眾。
兄弟勸請定保鏢
由於Bosco和Moon演得肉緊，被觀眾鬧到體無完膚，但二人笑稱愈鬧愈開心。身在內地拍劇的Bosco昨日受訪說：「呢個角色要觀眾憎先有話題，拍檔蕭正楠、張繼聰呢班死仔包，叫我請定保鏢，話我因住出去畀人打！（怕出街被鬧？）觀眾好明智，鬧都鬧角色，朋友打嚟講劇情，多謝大家關心套劇，呢啲係戲劇效果。睇到有網民留言講我同老婆喺飛機離婚嗰場，仲鬧我PK、好賤！哈哈！（有信心攞獎？）最想個劇攞獎，其他兄弟姊妹做得好有獎攞更加好，（賤男視帝唔想攞？）視帝呢啲獎……我向來睇得唔重！」
而Moon做「小三」被鬧，她在電話中說：「學阿聰喺劇中話齋，做小三預咗被炳！不過觀眾高智商嘅，佢哋鬧角色啫，劇情發展落去，遲啲觀眾唔會厭惡，反而覺得我好慘！」
感謝「老公」鼓勵
至於龔嘉欣在劇中喊戲獲激讚，更被推舉攞「最佳女配角」，連Bosco都話等佢攞獎請食飯。嘉欣昨以短訊回覆指多謝「老公」Bosco：「冇諗過大家反應咁好，對自己係好大鼓勵，（Bosco話等你請食飯？）多謝好多好拍檔嘅讚賞。（攞獎？）如果憑呢套劇攞係Bonus，入行八年都想有個肯定，如果攞到係最有意義嘅生日禮物。（被指有郭藹明影子？）我同佢冇得比，佢先係真正美貌與智慧並重。（擔心Moon被鬧？）我哋好朋友，出入我會保護佢！」
文：影視組