龐卓欣爆完厭食舊愛內疚道歉
前港姐龐卓欣轉型變為火紅YouTuber，月前曾在網上分享因初戀男友變心而得厭食症一事，不介意重提舊事的她早前接受本報專訪時，大爆初戀男友觀看片段後傳訊息給她道歉！而跟現任富三代男友孫智威一向愛得高調的她，坦言被男友的慳家本色所吸引，甜蜜透露已跟對方有結婚共識。
前港姐亞軍龐卓欣（Ada）年前設立其YouTube Channel，現為火紅的YouTuber，月前在網上分享因初戀男友變心而曾得厭食症一事。她早前接受本報專訪時自爆厭食症片段播出後，竟意外地收到初戀男友的道歉訊息：「我個初戀（男友）竟然有睇我段片，睇完仲即刻同我講好對唔住，話『原來你嗰陣為咗我咁樣，真係好對唔住，我知我依家做咩都冇用』，我睇完好開心。（你哋仲係朋友？）係係哋，有時會問候吓大家，始終我哋嗰時大家都係初戀。」
24歲女拍過6次拖
Ada透露由13、14歲時開始拍拖，到現時為止共有6次拍拖經驗。她希望透過成為分享自身經歷、衣着打扮及旅遊的YouTuber來接觸大眾：「雖然媽咪唔鍾意，但我唔介意人哋知道我嘅私隱，我好鍾意同人分享我嘅故事，以前嘅醜事都會分享晒。」
男友慳家着穿窿鞋
現年24歲的Ada與「鐘錶大王」孫秉樞孫仔孫智威拍拖約四年，二人感情非常穩定，愛得高調的她甜笑表示已跟男友有共識在其年屆28歲前結婚生B！期間她笑言當年經朋友認識男友時，對他完全不感興趣，其後卻被他的慳家本色吸引：「係佢撩我講嘢，後來開始慢慢認識佢個人，跟住就愈睇愈鍾意。（你最鍾意佢咩？）我最鍾意佢個人好搞笑、好貪玩，但貪玩得嚟識分開工作，同埋佢係讀金融，理財好叻，比較顧家，重點係雖然佢家庭背景好好，但佢係好慳，慳到冇得再慳，佢對鞋係着到穿晒窿都要着，呢樣嘢好吸引到我，我都要學吓佢，我屋企人都好鍾意佢。」她稱男友跟她的性格很相似，希望靠自己實力來創業，指對方暫不接手家族的鐘錶生意。
繼承家族金融生意？嘆冇生意頭腦
Ada透露自小在任職音樂老師的媽媽薰陶下，對音樂產生濃厚興趣，於大學修讀音樂學科畢業，現有教小朋友古典聲樂，希望可在五、六年後開設音樂學校。身為東驥基金管理董事總經理龐寶林女兒的她，大爆爸爸寄望她可繼承家族金融生意，可是她慨嘆自己沒有做生意的頭腦：「我之前都有喺爹哋度做過一、兩年實習，不過我覺得自己冇呢個天分。（佢好失望？）我諗佢都一定會失望，但我有盡過力試過，雖然暫時唔會繼承佢嘅生意，但將來未知。」
談及參選港姐後沒有簽約TVB，只教小朋友古典聲樂及做YouTuber，會否怕被人冠以「敗家女」形象？她說：「之前都會驚，但選香港小姐後就唔再Care人哋點諗，因為覺得就算理都唔理得咁多，同埋係佢哋唔知我依家有教小朋友唱歌啫，我係自給自足，有穩定收入。」
場地：Mini Hotel Causeway Bay
文：名人組