鄧麗欣頭耷耷李彩華風騷掃名店
藝人鄧麗欣（Stephy）與方力申相戀10年，今年3月突然宣布結束戀人關係，回復單身的小方先後跟選美佳麗張沛樂（沙律）及賭王千金何超蓮傳緋聞。反觀甩拖躋身剩女行列的Stephy，雖重新於市場放盤，但多個月以來一直「乏人問津」，日前她便單拖往練功夫發洩，打足兩個鐘再搵友人狂呻。至於早年曾與小方傳緋聞的李彩華近年事業愛情兩得意，當日巧合地與Stephy一同現身銅鑼灣，還豪氣地掃名袋。
向同事吐苦水
直言Dry爆冇人追的Stephy，近日為杜汶澤執導的新片《空手道》頻頻練功打發時間，日前下午1時多，她駕其波子座駕離開大埔寓所，直駛銅鑼灣，將座駕停泊到停車場後，Stephy步行到附近打功夫。冇拖拍的她投入練功，一練就兩個小時，其後和公司同事往附近餐廳開餐，雖然出了一身汗，Stephy仍然冇厘精神，全程苦瓜乾冇笑容，木無表情的她低頭不停食，醫飽肚便打開話匣子向同事狂吐苦水。
另一位曾與小方傳緋聞的同門舊愛李彩華近年愛情得意，當日亦巧合現身銅鑼灣，剛剛過了生日的她穿上背心裙，打扮靚靚地步入名店，行了一個圈立即有收穫，15分鐘後已拿着兩大袋戰利品由職員護送出門口。李彩華見記者即露出燦爛笑容，然後步行到停車場駕駛mini走人。
文、攝：追蹤組