鄭中基爆囡囡 練歌度劇本

歌手鄭中基（Ronald）昨日出席明年假紅館舉行的《鄭中基PLAY IT AGAIN世界巡迴演唱會》記者會，期間他在台上大玩人生道路大富翁，行到象徵事業低潮的「曲街」時，估計是指當年他在飛機醉酒鬧事，他說：「都啱嘅，嗰陣需要時間畀自己沉澱吓，諗吓之後點。」又形容自己命運是「衣錦還鄉」：「當年喺台灣出道，之後先返香港，攞最佳男配角獎又係先攞金馬獎再攞金像獎，到今次開騷係喺澳門開咗，先知道紅館有期。」

唔知咩準則

Ronald原定明年1月28及29日（大年初一及初二）開兩場騷，因歌迷反應熱烈，加開1月27日年卅晚一場，問仍欠下不少飛債的他可會再加場？他笑說：「開午夜場，我冇所謂，但隊Band要瞓。（開日場？）睇吓佢哋點搞。」講到相隔十年再開騷，問他期間共入紙了多少次？他坦言：「七次，唔知佢哋嘅準則，淨係知唔得。」又笑指可以為下次演唱會開始入定紙：「依家入定十年後。」

操弗等騷肌

嘉賓方面，Ronald表示未落實，但預告爸爸會上台彈結他，而囡囡亦有機會唱歌：「佢應該初一嗰場會嚟，因為年卅晚同初二係九點半先開騷。」他笑言囡囡已經在練歌：「係佢自己作，佢都幾即興，所以佢啲歌我哋係彈唔到，佢個個星期都會改。（你哋合唱？）佢唔唱我嘅歌，淨係唱自己嘅歌，而且同佢玩，佢會設定埋對白畀我，所以同佢玩可以慳水慳力。」問囝囝可會上台？他說：「唔會啦，佢仲細，而且好準時就要瞓。」至於可會操肌肉騷肌？他說：「盡量，依家都有跑步練氣。」而演唱會門票今日起公開發售。

文：音樂組　

攝：張福宏