李佳芯被王浩信胸肌壓親
無綫藝人李佳芯（Ali）及洪永城昨午出席《myTV SUPER》記者會，Ali近日忙於與王浩信拍攝新劇《踩過界》，談到二人的「超激親熱戲」時，她笑說：「估唔到一開工嗰個禮拜就拍，佢好勤力，拍之前嗰一秒都仲喺度做掌上壓。（胸貼胸？）都係。（呼吸唔到？）佢做少啲掌上壓會好啲囉！（佢胸大定你大啲？）一定係佢啦！」
前晚節目巡禮內，洪永城來年暫未獲任何劇集的演出安排，但他自言沒有失望：「明年會做多啲綜藝節目，劇集方面公司可能安排下半年呢。」他笑言自己可往西藏拍旅遊節目時，順便演《愛情來的時候之布達拉宮之戀》，且打趣可做「人工呼吸」。被問到女拍檔時，他即拖李佳芯落水，又指不怕與對方傳緋聞：「百無禁忌，我得一個（指女友唐詩詠）。」
