有錢人三妻四妾時有聽聞，齊人之福人人都想，但是福是禍，要視乎個人品格同修行！最近全城熱話，莫過於是劉鑾雄公開數臭昔日共枕多年的舊愛呂麗君，其實白紙黑字如此高調宣布割席已經夠出位，但劉鑾雄一於去到盡、數到盡，出盡洪荒之力狂數呂麗君收過自己20億元資產之餘，又以「貪得無厭」來形容她，更批評就算畀多200億呂麗君，她都會為1蚊雞而出賣自己！甚至話呂麗君經常用不同藉口苛索金錢，一分一毫都會計得清清楚楚，又大爆有次叫呂麗君打賞侍應三千蚊貼士，回家後呂麗君叫佢「還錢」！
大劉力數舊愛有前科，昔日也曾大爆已故前妻寶詠琴的不是，有人謂家和萬事興，家衰口不停，家醜不外傳，即使千錯萬錯，面人哋畀，假自己丟，呂麗君始終都是一對子女的媽咪，試問一對子女如何面對外間的目光？又如何看待母親？一夜夫妻百夜恩，話晒昔日同床共枕卿卿我我，就算不念當年情，也不需要句句插到盡、毫無餘地數臭對方！俗語有云發財要立品，姑勿論自己曾付出幾多，是否要揭開肚皮盡數對方不是？人在做天在看，土豪同富豪，有辦你睇，真的一線之差！