李彩華甜蜜牛一 男友秘製靚Cake求婚
藝人李彩華（Rain）昨日33歲生日，獲拍拖兩年的男友何遠恒飛到內地陪她在工作中度過，男友更自製生日蛋糕為她驚喜慶生。李彩華表示男友雖然帶備鮮花有意向她求婚，但機警的她一早將事情識穿，最終男友都沒有開口，但她表示一直視對方為結婚對象，結婚只是時間問題。
李彩華（Rain）近年主攻內地市場，經常穿梭兩地狂賺人仔，昨日（11日）是她的33歲生日，身處內地工作的她在微博上載捧着玫瑰花的自拍照及生日蛋糕照片，流露甜蜜笑容，原來曾是無綫「新五虎」成員的男友何遠恒陪她過生日。
「只是時間問題」
聯絡上身在內地的Rain，她透露收到不少朋友的祝賀，連拍拖兩年的男友都飛到內地台州陪她工作中過生日，令她感動，她說：「其實佢知我好鍾意一個卡通造型人物，上年已搵師傅整咗呢個卡通人物造型蛋糕畀我，點知貨不對辦，佢見我有啲失望，今年佢就瞞住我秘密上堂學整嚟送畀我，好有心思。」李彩華又指自己機警識穿了男友的求婚大計，她說：「我都知佢想求婚嘅，但我一早識穿佢，所以最後佢都冇講到。不過我都以佢為結婚對象，結婚只是時間問題。」
最緊要長做長有
問到何時拉埋天窗？Rain坦言現時仍以事業為重，更自認非闊太命：「就算依家嫁畀億萬富翁，我都繼續工作，我唔係闊太命可以日日High Tea。我覺得有能力就每日都要工作，日後可能做唔到咁辛苦嘅嘢，都希望以我能力範圍做啲慈善活動幫吓人。」問到生日願望，她表示希望身體健康，因為近年在內地工作多病痛，令她明白到健康的重要，她說：「希望長做長有，學到老活到老。依家喺內地拍劇，之前因為急性胃炎入院，希望健健康康，唔影響拍戲，自己又可以舒服啲。」
文：專案組