萬綺雯爬樹求生 損手爛腳
無綫劇集《致命復活》演員郭晉安、萬綺雯、黃德斌及朱晨麗等到粉嶺宣傳，畏高的萬綺雯與朱晨麗玩爬樹時不停喊驚，萬綺雯又被蚊蟲咬手，與玩飛索擦傷腳的郭晉安玩到損手爛腳。
郭晉安（安仔）、萬綺雯（蚊蚊）、黃德斌、朱晨麗及譚凱琪昨日到粉嶺出席《致命復活》之「求生在野」宣傳，畏高的蚊蚊爬樹時腳震，不停依嘩鬼叫，朱晨麗爬樹時亦相當論盡，要多位男士協助，又喊驚又要得戚擺甫士影相；安仔與黃德斌則玩飛索在空中滑行，兩個大男人皆高呼好驚。
吊威吔衝擊收視
玩爬樹及飛索的蚊蚊及安仔玩到損手爛，蚊蚊被蚊蟲咬手，安仔則擦傷腳。蚊蚊受訪笑說：「真係好致命，監製拍完嘢就唔理我哋，要我哋做啲咁危險嘅嘢，我畏高好驚呀，腳都震埋，監製又話棵樹好矮。以前拍《我和殭屍有個約會》吊威吔都係吸啖氣就跳落去。」安仔則說：「同吊威吔差唔多，不過衝力猛啲。」說到收視，安仔說：「應該好啲，希望收視好似我劇名韋逸昇咁日日升。」蚊蚊則說：「頭先我同安仔打氣嗰陣叫錯咗《老表，你好hea！》個名『在野』，監製即刻望住我。」蚊蚊與安仔稱不會一齊食飯睇首播，因她會與老公去旅行，問收視好會否再拍泳裝照放上網答謝觀眾？她說：「唔知，睇心情啦！」安仔笑說：「你可以影定，畀啲我睇先，我再幫你揀相。」
朱晨麗賺辛苦錢
朱晨麗被指與電子業富豪撻着，更將於淺水灣開畫廊，她說：「私人嘢唔講，唔好影響到人，大家係朋友，（依家有冇拍拖？）私人嘢唔講，依家同工作拍拖，畫廊係同三個教友一齊夾錢開。（忽然富貴？）都介意人哋咁樣講，自己喺香港讀書打拚，賺嘅都係辛苦錢，被人咁樣寫自己都有試過匿埋喊。」
文：影視組