趙哲妤露肚任「BB」食風

早前驚爆未婚懷孕的趙哲妤（Uny），還有個多月便生得，最近特別搬到位於汀九的服務式住宅安胎，但BB父親繼續冇影，搞到谷爆的Uny日前相約區議員訴苦！當日下午5時許，Uny駕車離開寓所直駛青衣，停車後走入一間連鎖茶餐廳，未幾區議員張慧晶與兩名男友人到場，四人坐卡位密密傾。期間，Uny一臉苦情講不停，傾足成個鐘始離開，訴完心中情的Uny難掩愁容，一度嘴扁扁。見完議員，她再駕車到土瓜灣一個屋苑，逗留至凌晨12時半始離開，腹大便便的她還順路載兩名友人返家後才打道回府。

約友蒲早出晚歸

雖然肚子日漸長大，但Uny仍經常早出晚歸，另一日又駕車往尖沙咀購物，買蛋糕又買護膚品，隨即再去銅鑼灣約朋友食飯。她穿上的緊身套裝明顯不稱身，上衣被巨肚撐起不時向上縮，露出一大截肚皮兼肚臍，任由腹中BB「吹風」！當晚，Uny與友人又再歡聚到凌晨12點，然後挺着大肚做「柴可夫」逐一送朋友離開。

趙哲妤搵議員好友訴完苦，但仲係扁晒嘴。	放大圖片	趙哲妤相約好友聯歡，做埋司機都冇計。

私院分娩請陪月

其後，記者致電Uny時提到向區議員訴苦，她說：「佢係我好友，一向當佢係半個家姐，佢仲話我生完幫手湊B！（依家經濟係咪有問題？）無論點都會畀BB最好，已經安排咗去私家醫院順產，都有請工人同陪月，但搬咗出嚟住真係一闊三大。（見你啲衫好似唔啱着？）都係！我淨係重咗十幾磅，都冇買過大肚衫，嚟緊都會注意番。」問到BB爸爸仍失蹤，她坦言冇乜見面：「依家我都處理到，如果有咩特別事佢都會幫手，經濟上冇搵佢幫，剪臍帶都唔會啦！總之三餐溫飽、有瓦遮頭已經好幸福。」

文、攝：追蹤組