嫌同舊愛霆鋒冇火花 學而計「啱數」開騷想搵王菲幫拖
現年44歲、出道樂壇22載的趙學而，於11月得償所願在Star Hall舉行兩場演唱會，揚言個唱不會有天花龍鳳大製作，但入場歌迷必感值回票價。夢想中的嘉賓人選必定是王菲，但對請緋聞舊愛謝霆鋒上台，學而形容兩人﹕「冇火花囉！」
趙學而原先計劃明年才開演唱會，但因九展突然有期，她再三思量下決定「開騷」：「以往幾年一直有人搵我開，但我一路都推，覺得冇咩新作品出，貿貿然開演唱會怕畀人誤會我告別呀！」直至今年參與劇集演出及唱主題曲，適逢九展於11月13、14日有檔期，感覺比較「啱數」她才答應。被問到想給歌迷呈現哪類型演唱會？她覺得歌手用心唱，比起一個天花龍鳳的製作更重要。
最怕碌盡人情卡
講到嘉賓安排，學而稱仍心大心細：「有啲歌又好想有嘉賓，有啲歌又覺得不如自己唱，請嘉賓又難開口，我最怕碌人情卡。（最想邊個嚟？）我最想請梗係王菲啦，王菲嘅演唱會係有錢都睇唔到嘛，佢可以嚟做你話幾正。」直接搵緋聞舊愛霆鋒請王菲？學而笑言：「咁又唔使一定咁嘅，仲有好多途徑嘅。」若請不到王菲，不如請霆鋒來當嘉賓呢？學而即笑笑口說：「唔……我覺得呢個配搭好似冇乜火花囉，分分鐘我老公爭住上台同我唱。」
老公憂體力不繼
老公對她開演唱會會否很緊張？學而承認老公最擔心是她的體力和飛債：「我始終一把年紀嘛，做一個演唱會體力負荷係好犀利，老公有時間會陪我踩單車練氣。而飛嘅嘢，佢都話好煩，問我啲人打嚟點算？我咪話你答佢唔搞咪得囉，唔使煩嘅。」下一站進軍紅館？她卻另有睇法：「我嘅歌唔係好Party feel，形式同紅館一般睇騷唔同，所以先喺九展做，攞咗感覺先，有機會先去大啲場館做啦。」門票反應熱烈已由一場變兩場，學而強調不會給自己壓力：「既然係做自己鍾意嘅事，不如放輕鬆心態去唱。」
文：音樂組
攝：劉斌
服裝：Matt Hui
場地：PARC 古道具公園