劉芷盈性感極限 靚股引星爺
皮膚白淨的劉芷盈（Mizer）自爆原來有「怪病」，一見到陽光就會狂標眼水，被朋友笑是殭屍的她連家中都要長期落簾！講到拍戲性感底線，她堅持三點不露，如果能跟周星馳或黃秋生合作的話，坦言不介意做「影後」，出賣玉背甚至「靚股」！
組合Magic Gals成員劉芷盈（Mizer）身材勻稱，皮膚白晳，她卻自爆自小被「怪病」纏擾，眼睛敏感的她一被陽光或紫外線曬住，雙眼就會不斷流眼水及不能擘大。
唔驚黃秋生惡
她苦笑說：「朋友問我係咪殭屍嚟，點解望陽光就好似想死，基本上我屋企窗簾都係長期拉埋，朋友同屋企人上到嚟都問做咩日光日白拉埋窗簾，其實係唔拉窗簾我對眼擘唔大。（睇過醫生？）冇，但問過醫生朋友，話我對眼可能屬於敏感刺激性，同淚腺可能比較發達。」儘管如此，仍無阻她跟陽光玩遊戲：「以前想曬到有古銅膚色，試過成個暑假不停曬三個月，最後發現膚色唔靚，好似曬到污糟咗咁。」
工作方面，除了專注音樂事業，Mizer亦演過不少電影包括《喜愛夜蒲3》、《江湖悲劇》等，問到拍戲想挑戰甚麼？她說：「當然想做番主要啲角色，同埋想拍笑片，睇完星爺（周星馳）套《美人魚》後覺得好正，其實喜劇好難演，就算本身好有喜劇感，但都要用深層演技先可以令觀眾都笑。（想同星爺合作？）嘩，呢個係夢寐以求，係夢想！」除了星爺，她亦希望跟影帝黃秋生合作：「佢非常有內涵同才華，同埋演技太厲害！（怕唔怕秋生惡？）唔會，如果做足本分，前輩係睇得出有用心，有啲人都話星爺好惡，但如果有機會合作會盡力做。」
性感戲靚就OK
講到拍戲接受到的性感程度，Mizer說：「三點式，床上戲嘅話適量性感OK。性感得嚟感覺正面係OK，如果低俗或意淫就唔得。（接受到半裸甚至全裸？）我底線係唔露點，例如半裸但露背都OK。（露pat呢？）要睇劇情需要，露得嚟靚我可以接受。（如果同星爺或秋生合作呢？）好啦，係OK嘅。（肯全裸？）肯露pat pat，我身材唔係咁好，全裸都冇咩睇。」
Profile
姓名：劉芷盈（Mizer）
年齡：27
身高：1米66
體重：46kg
三圍：33C、24、33
興趣：打羽毛球、跳舞、潛水
簡介：入行前曾做空姐，之後入行做model，現為魔術跳唱組合Magic Gals成員
文：音樂組
攝：劉斌