鄧麗欣喪踢拆祠「棠」腳都瘀
近日為新戲練空手道的鄧麗欣，邀得功夫根基深厚的歐錦棠任導師。踢腿表現相當狠的她自爆初學時烏龍百出，因不懂就位與就力，慘令歐錦棠成被虐對象，踢到對方腳部紅腫之餘，亦數不清誤「拆祠堂」的次數！近年集中影壇發展的她表示唱歌及感情事也要暫放一旁。
過往多演柔弱角色的鄧麗欣（Stephy），最近接拍杜汶澤新片《空手道》飾演空手道高手，由於對空手道零經驗，故開拍前特別邀得歐錦棠任導師傳授招式。有運動底子的Stephy熱身拉筋全無難度，揮拳、Side Kick至埋身肉搏亦有板有眼，雖然揮拳時因過分投入而誤打中阿棠的耳朵，但仍被讚有潛質。
打戲一Take過有壓力
雖然曾打過泰拳，但Stephy不懂就力，結果在首堂練踢腳後搞到雙腳全告瘀傷，她說：「仲踢到歐師傅隻腳都紅晒！（唔應該嘅部位？）唔使講啦！梗係不在話下，數唔晒令佢有幾多傷，好在佢有教點收腳，去到重要部位時收得番。」提到戲中將有一場與擁有空手道三段帶的選手對戰兩分幾鐘，屆時還要一個鏡頭到尾，Stephy不諱言已感壓力：「之前冇得度招，仲要一鏡過，但練咗成兩個幾月，唔好浪費個真實感！對方係有經驗嘅高手，我驚自己就唔到佢，事前都會見吓面夾一夾先。」問到會否積極收身？Stephy表示反而要鍛煉肌肉來支撐身體，屆時戲服將會露腰，故積極操出馬甲線。
轉型演員未必再唱
首次參與拍打戲的Stephy笑指一直想嘗試不同角色：「呢一、兩年嚟都係集中拍戲，拍咗好多唔同類型作品，都有成年冇出新歌！依家想慢慢轉型做演員，同公司都有共識，可能係獨立或電影主題曲就會考慮。（醉心拍戲係咪唔拍拖住？）都未準備好！準備事業再創高峰，感情事隨緣。」
至於阿棠激讚Stephy是芸芸學生中最聰明一個，但卻很懶惰：「戲中佢有絕招，係要騰空打觔斗，正常係冇武術根底做唔到，但佢半堂就學識，可能同佢平時打排球趴地救波有關，依家佢直頭可以落山！」同樣參與該片的他透露要與摔角手對打，事前也要進行特訓。
文：影視組
攝：林蔚恩