黃心穎爆瘡箍牙Look獻醜博上位
宅男女神黃心穎破格以四眼、箍牙再加痘痘的醜女Look拍攝無綫新劇《雜警奇兵》，大有機會繼《食神》「火雞」莫文蔚、《阿旺新傳》「李笑好」湯盈盈後，以醜突圍，成功上位。
藝人黃心穎、黃智雯、黃智賢、C君及麥嘉倫等昨日現身電視城，出席新劇《雜警奇兵》造型記者會，本是「宅男女神」的心穎，捨棄靚樣與好身材，改以四眼、箍牙、痘痘醜女Look示人，務求以醜突圍。
與C君有感情線
心穎坦言勁Like自己箍牙Look：「好多同事話呢個Look好襯我，我5年級時都係箍牙戴眼鏡，但就冇乜青春痘，嗰時鍾意打籃球皮膚黑啲。記得有次食完波餅，我要掹番啲牙肉出嚟，好痛呀！（醜足全劇？）幾集啫，會變番靚，好似平時嘅我咁囉！」心穎又爆與C君有感情線，她說：「第一次同C君拍劇，估佢會爆肚，到時我學嘢。（有親熱戲？）咁嘅樣應該冇，變靚之後就未知。（介意拍咀戲？）應該唔介意，但箍牙嗰陣就唔好，大家都痛！」
黃智雯假肚保暖
至於黃智雯昨日則戴上道具假肚扮孕婦，她笑說：「我裝咗兩個假肚，扮有咗6個月，暫時都唔覺得太辛苦，反而覺得幾保暖，劇中都有啲動作戲份，我會大住肚跑、追車同捉賊。」問到智雯會否有做媽媽的憧憬，她謂：「戴起咗個假肚，反而會戥做媽媽嘅辛苦，因為真嘅肚一定好重，坐低起身都會好辛苦！」此外，昨負責介紹演員出場的麥嘉倫，面部表情欠自然，說話亦不清晰，但他否認抱病上陣：「我冇唔舒服，我之前喺屋企撞到茶几，醫生話十日後消腫。（冇其他唔舒服？）冇，多謝關心。」
文：影視組