阿正@RB捧老婆做「港版Adele」
樂隊RubberBand（RB）加入樂壇9年，隊長兼結他手阿正（馮庭正）甚少談及私生活，最近傳出他斥巨資捧今年初剛拉埋天窗的太太黃淑玲（Sherine）做歌手，正式揭出阿正家底豐厚，父親是億萬富商，有大大條水喉支持他打造老婆做靚聲人妻，日前兩人更孖住夜蒲帶老婆見世面。
阿正去年在瑞士向「馬來西亞小姐」Sherine求婚，今年初在半島酒店舉行婚宴拉埋天窗，由求婚到婚禮，阿正均「落重本」既花心思又肯掟錢，錫老婆錫到燶的他最近更斥巨資，為向來愛唱歌、歌喉靚絕的老婆出碟圓歌手夢，推出靚聲HiFi碟。不少人均好奇，同樣為本土樂隊的Mr.早前內訌，揭出除了富貴主音Alan不愁生活外，其他成員均要搵「副業」搵銀，相比之下，為何阿正能夠有如此財力？
紐約學唱歌老公交學費
一直低調的阿正從來沒有透露過億萬太子爺身份，要撐老婆出碟對他而言毫無難度，其實Sherine於2014年已轉做歌手，不時有公開演出，聽過其歌喉的均大讚有「港版Adele」影子，既然老婆有天賦，阿正亦撐到底，最近讓Sherine簽約老友農夫的唱片公司老闆DJ Tommy任經理人，自己則於財力無上限支持，同時協助作曲及擔任唱片監製，早前出席活動已不時提老婆將出碟，做足事前宣傳。
為了幫老婆出碟「開路」，阿正最近頻頻帶老婆夜蒲，介紹音樂圈好友讓她認識。日前凌晨12時許，剛離開夜店的兩人翹到實行，Sherine一臉開心，如同開籠雀般翹實老公說不停，兩人行去的士站等車，由於人龍超長，阿正為免老婆呆等，愛妻號的他即時取出電話Call車，未幾有車駛至，兩人齊齊登車回家溫馨。
富爸爸係大業主！
被指會被打造成「港版Adele」，Sherine難掩興奮，接受記者訪問連聲說唔敢當，問到老公打本出碟？她說：「唔係淨係錢嗰方面，早排我去咗3次紐約學唱歌，老公都好支持，都有幫我畀埋學費。（隻碟搞成點？）依家錄好咗歌，影埋封面！」及至問到老公家族富有？她即時支吾以對：「啊，錢方面我唔知喎！」隨即匆匆收線。
據知阿正父親馮熾均是身家過億的大業主，本身亦是建築師；而阿正兄長馮庭碩為資深大律師，曾參與龔如心的千億爭產案。馮家可謂富三代，祖業造雞毛掃起家，其後投資物業有道發迹。而阿正早年已婚，與前妻育有一子一女，直至今年初與Sherine再婚。
文、攝：追蹤組