田蕊妮踢爆陳豪愛「大奶」

陳豪、田蕊妮、蔣志光、楊秀惠及陳婉衡等昨日到大坑宣傳新劇《來自喵喵星的妳》，主角之一的胡定欣因病缺席。眾星在秀惠的刨冰店玩遊戲，吸引大批街坊圍觀。身為老闆的秀惠滿場飛招呼大家，期間阿田及秀惠負責整刨冰給陳豪，兩女大爆陳豪鍾意奶，於是在刨冰上狂加煉奶，令陳豪食得津津有味。他說：「奶味重，我鍾意！」他又讚阿田的刨冰夠的骰，秀惠搶着說：「我以為你鍾意大！」嚇得陳豪說：「兩杯（刨冰）都好。」

有信心結局收視升

陳豪及阿田接受訪問，問到劇集尾聲有何爆點？陳豪笑說：「我哋三個一齊落水，夠唔夠？」對於劇集收視未算理想，兩人直言冇失望，陳豪說：「外星人係時候發功，希望觀眾再畀多啲耐性，我哋努力嘗試咗，有信心收視會上番去。」阿田亦說：「我哋盡咗力喇，個結局我覺得好感動，寫到寵物同主人之間嘅感情。」提到陳豪被指安排大仔專攻畫畫，有三名子女的他笑言：「我已經係放鬆爸爸，但小朋友好多基本嘢要學，要忙應付學校啲面試，又要教佢哋剪紙、畫公仔，唔係話要佢哋好天花龍鳳，但願佢哋應付到香港教育制度。」

楊秀惠主力做美容

秀惠表示刨冰店於二月開舖，投資了六位數。問到是否已回本？她說：「我主力都係做美容，但呢間都做得幾好，好多朋友支持。（擔心冬天生意冇咁好？）少少，所以都有啲季節性甜品同多士。」對於劇集收視跌，秀惠認為部分觀眾現時喜歡上網追劇，身邊不少朋友都有追看，她笑說：「我覺得口碑幾好喎！我前幾日去新加坡，好多人嗌我角色名，話我角色賤格但又好好睇，我開頭都驚女士觀眾會討厭我，估唔到都幾受歡迎。」

文：影視組