趙哲妤大肚搬三次屋捱貴租
前中國小姐趙哲妤（Uny）驚爆未婚懷孕，「經手人」至今仍未「蒲頭」，Uny要獨力面對一切，據悉其家人為此嬲爆，不肯為她添置BB用品，Uny惟有急急搵屋搬，昨日她出席活動時坦承佗住BB都已搬了三次屋，認真淒涼。
早前Uny大着肚仍為家人有份投資的食肆宣傳及開會，表面上看似風平浪靜。但據悉Uny的家人對她未婚懷孕一事堅嬲，不肯與Uny直接對話，又不肯為她添置BB床，Uny聞到(火羅)味惟有搬家。
肚皮細估佗女
昨日Uny出席活動，透露還有六十多天便分娩，還未決定生產方式，甚至未知BB的性別，她說：「我個肚細，朋友都估生女，我都期待同佢扮靚！」Uny還自爆剛搬到服務式住宅居住，她明白大肚搬屋是禁忌，不過，懷孕期間她前後已搬了三次屋，而且都是她獨個兒完成。問她最辛苦是否BB爸爸冇幫手？她說：「最辛苦係每個月要捱貴租。」同場的藝人邱美薇承認與異性發展中。
勤力工作氹雙親
由於Uny與家人關係因她未婚懷孕而由良好轉差，為了與父母「重修舊好」，每日她都會到店內返工，希望勤力工作氹父母：「我好注重健康，一星期有兩、三日食素，餐廳主打fusion，西式、中式、泰式都有，我依家先做好宣傳同marketing，做好九龍城分店。」過往曾經營多瓣生意，包括指甲店及餐廳，均是由趙母打本支持，而素食餐廳，趙母投資了七位數，問到將來會否接手餐廳生意？Uny面有難色，沒有正面回答：「冇諗到咁長遠，不過我由細到大都有去媽咪公司幫手，13歲暑假都已經去，學到好多做生意嘅嘢。」
文：名人組